Республикыште кинофестиваль семын эртарыме тыгай конкурсыш Российысе 25 регион да Казахстан гыч 7-17 ияш 512 тунемше (56 школ ден студий) ушнен.
Нуно жюрилан аклаш 164 пашам колтеныт. Кинофестиваль кок блок дене эртаралтын. Икымшыште Марий Эл гыч участник-влак лийыныт, кокымшышто – кундемна деч ӧрдыжтӧ илыше-шамыч. Йоча-влак тӱрлӧ темылан анимационный, документальный, игровой фильмлам, видеоклипым, информационный сюжетым да социальный рекламым ямдыленыт.
Советский район Ӧрша школын «Дети войны» фильмже, «Мультиварка» йоча анимаций студий ден Йошкар-Оласе ДШИ-н «Изосымыктыш» пӧлкаштын «Это не сон» ден «Лето, плавки, рок-н-ролл» пашашт, Советский посёлкысо 3-шо номеран школын «Странный Новый год» ден «Цена» фильмышт ойыртемалтыныт.