Марий Элысе кум спектакль Российысе театральный постановко-шамычын «Шӧртньӧ фондышкыжо» логалын.
Российысе театр пашаеҥ-влак ушем 300 спектакль гыч сеҥыше-шамычым палемден. Нунын коклаште М.Шкетан лӱмеш Национальный драмтеатрыште Степан Пектеевын «Йыван Кырла. Путёвка в жизнь», Г.Константинов лӱмеш Руш драмтеатрыште Владислав Константиновын «Сладострастники», Республикысе Курчак театрыште Алексей Ямаевын шындыме «Йӱд орол» постановкышт улыт.
Сеҥыше радамыш логалше спектакль-влакым телевизор дене ончыкташ ямдылат. «Триколорын» операторжо нуным «Большой эфир» каналыште ончыкташ тӱҥалеш.