- Облепихе дене. Ты саскаште чыла гаяк тӱрлӧ витамин, шуко минерал улыт. Облепихе дене маске коян, комбинированный коваштылан келшен толеш.
Облепихе саскам немыр гай лиймешкыже тыгыдемдыза. Шӱргӧ коваштыда кукшырак гын, тушко изиш сливким ешарыза, а коян коваштылан маскым ямдылаш ӱмбалым ешараш лиеш. Маскым ару коваштыш йыгыза да 20 минут гыч леве вӱд дене мушкын колтыза.
- Полан дене. Тиде саскаштат витамин ден минерал шуко. Тӱрлӧ коваштылан келшен толшо полан маске коваштым шоҥгемме деч арала, вӱдыжгым куча.
Ик стакан мушмо поланым шоктеш пыштыза да ӱмбакыже шолшо вӱдым опталза. Саскам шокте гоч колтыза, лекше немырыш 2 изи совла кукурузо крахмалым ешарыза да сайын варыза. Маскым ару шӱргӧ коваштыш йыгыза, пел шагат гыч леве вӱд дене мушкын колтыза, шӱргыш кремым йыгыза.
freepik сайт гыч налме фото.