Зинаида Оразаева, Тюмень ола:
— Шернур район Изи Пӱнчер ялыште шочынам. Ты вершӧр гыч 17 ияшак вес кундемыш лектын каенам да Тюменьыште 50 ийым илем гынат, кызыт Ӱячрня пайремым эртарымым шарналтем. Ӱярня эрдене авана команмелнам кӱэштеш ыле, а мемнам помыжалта да манеш ыле: «Ӱдыр-шамыч, уремышке шуршо почкаш лекса». Меже лумышто почаҥынна. Уремыштак шуко вере лумым чумырымо, курыкым ыштыме. Ме, йоча-влак, курык гыч нимо деч посна мунчалтена да «Ӱярня йор-йор, мелна чож-чож» манын кычкырена ыле Чыла йоча-шамыч уремыште курык гыч мунчалтеныт. Мемнан изина годым телыжат пеш йӱштӧ да лумжат ятыр лийын.
Вара тамле мелнам кочкаш пуренна. Шуко кочкышым авана ямдылен, тидлан пеш мастар ыле. Тунам вет подкогыльым торык дене, коя да тыгыде шӱраш когыльым ыштеныт. Пареҥге немырым, муным луген да шӧрым ешарен, пулашкамуным коҥга петырымеке шынденыт. Туарам шулыктымо ӱеш тушкен кочмо. Теле мучко кочкаш ӱян торыкым шогалтен кылмыктен ямдыленыт. Жаркой манме кочкышым коҥгаш шӱкалыныт. Ӱярнялан пеш тамле шоҥан пурам шолтеныт, шаньгамат, шылан когыльымат кӱэштыныт. Ӱстембал тич чес ыле. Мый Тюменьыштат шӱрашан мелнам ыштен пукшем, пеш йӧратен кочкыт.