Марий Элыште «Формирование комплексной системы обращения с твёрдыми коммунальными отходами» федеральный проектын «Экология» нацпроектше почеш паша умбакыже шуйна.
Кодшо кечылаште Марий Элым вуйлатыше А.Евстифеев проектын черетан этапшым шуктымо йодышыш куснаш кӱштен. Ты этапше республикыштына шӱкшакым посна погымо йодыш дене кылдалтын.
Республикын пӱртӱс поянлык, экологий да йырым-йырысе средам аралыме министрже А.Киселев нацпроект почеш тений шуктымо сомыл нерген ойлен. Теве Курыкмарий район Вопшынӓнгӹр ял воктене шӱкым сортироватлыше мобильный комплексым вераҥдыме. Тудо идалыкыште 15 тӱжем тонн шӱкым сортироватлышаш. Министрын мутшо почеш, кызыт собственник шӱкым погымо, наҥгайыме, обрабатыватлыме да моло шотыштат лицензийым налме шотышто тӱрлӧ пашам шукта.
Республикыште куштырам посна погаш 330 контейнерым вераҥдыме. Нуно Йошкар-Олаште, Волжскышто, Медведево ден Советский посёлкылаште улыт. Тылеч посна федеральный бюджет шӱкым посна погаш у контейнер-влакым налаш субсидийым пуа. Кундемнат Российысе тиде 46 субъект коклашке логалын.
Ойырымо 4601,1 млн теҥге дене 318 евроконтейнерым налыт. Тушто пластикым оптымо шотышто маркировко лиеш. Марий Элыште куштырам посна ойыркалаш тӱҥалмым Российысе Пӱртӱс поянлык да экологий министерстве сайлан шотлен.
«Кызыт мемнан контейнер-влак улыт, но вераҥдаш площадке-влак огыт сите. Санитарный нормо почеш ме нуным посна оборудоватлыме верыш гына шогалтен кертына. 2022 ийыште контейнер-влакым кок пачаш шукемдыме дене куш вераҥдыме йодыш шочеш», – ойлен министр.
Тыгак совещанийыште куштыралан «кокымшо илышым пуышо» пилотный проект нерген каҥашыме. Ынде еҥ-влаклан тыгай куштырам (кагазым, картоным, яндам, алюминий атым, полиэтиленым, йӱыш, шампунь, мушмо средства ате-влакым, канистрым, шӱкшӱ вургемым) посна поген сдатлыман. Тудым висат да кондышылан оксам тӱлат. А вара посна мешакеш оптен, сортироватлыше предприятийыш наҥгаят.
Кызытеш контейнерла воктене шӱкшак кийылтеш. Куштырам налше компанийла дене кылым ыштыман. Тиде йодышым А.Евстифеев мучаш марте лончылаш, экономически кӱлешан пайдам кондышо пашашке савыраш кӱштен.