6 апрель гыч кажне шуматкечын «Звезда» телеканалыште «Звезда-2024» вокальный конкурсым ончен кертына.
Тений икымше гана тушто Российнан чыла 89 кундемже гыч участник-влак шке мастарлыкыштым ончыктат. 89 эн виян мурызо-шамыч. Элнан тӱрлӧ лукшо гыч эн талантан 89 самырык еҥ. Нуно икымше гана ик сценыште пырля чумыргат да шочмо кундемыштын чапыштым аралат. Мурызо-влак верч Российысе телезритель-влак йӱклаш тӱҥалыт, лӱмлӧ эксперт-влак шке шонымашыштым каласат, да проектыште сеҥыше пале лиеш. Тӱҥ призше – профессионал семын вияҥаш окса надыр.
Марий Элын чапшым Йошкар-Олаште шочшо 20 ияш Павел Кузнецов арала. Шкеж нерген тудо проектыште тыгерак палдара:
– Мый марий акцентан, руш характеран да бельгийысе архитектуран изи Йошкар-Олаште шочынам да кушкынам. Тушто 17 ияш марте иленам. Ондак муро дискым чӱкташ тунемынам, варажым гына – кутыраш. Санденак ача ден авам 4 ияш улмем годым мыйым вокал студийыш коштыкташ тӱҥалыныт. Мурымо деч посна саксофон да кларнет дене шоктен моштем. Ятыр конкурсышто лийынам, тӱрлӧ концертыште выступатленам. Шке олаштем веле огыл, Российын моло олаже да йотэллаштат.
Кызыт «Эстрадное пение» специальность дене Гнесинмыт лӱмеш Российысе музык академийын Эстраде да джаз сымыктышын музыкальный училищыштыже нылымше курсышто тунемам. Яра жапыште Москошто кошташ йӧратем, уло кумылын кочкаш ыштем. Путешествийлан кӧра моткоч кумылаҥам, да тидым шӱм-чонлан да каплан кӱлшӧ эн сай сомыллан шотлем. 10 элыште, Российысе шуко олаште лийынам. Спорт дене заниматлаш тыршем, туштат пашалан да тунеммашлан вий-куатым налам.
П.Кузнецов Йошкар-Оласе 28-ше лицейыште, Т.В.Иштрикова лӱмеш «Синяя птица» гуманитарный гимназийыште тунемын. Кларнет дене шинчымашым И.С.Палантай лӱмеш тӱвыра да сымыктыш колледжыште налын. Москосо вузыш тунемаш пурымекыже, 2021-2022 ийлаште рӱдоласе «Зарядье» залыште капельдинерлан пашам ыштен шуктен.
Чолга рвезе шукерте огыл шкеж гаяк талантан да уста самырык-влак коклашке, Молодёжьын тӱнямбал фестивальышкыже, ушнен. А тыгай мероприятийже тудын илышыштыже шагал огыл, да ончыкыжым эшеат шукемеш манын шонена. Сандене лишыл жапыште шкенан Павел землякна верч айста йӱклена!
«Звезда» телеканалын конкурслан ямдылыме фотожо.