10 июльышто «Авангард» самырык-влаклан военно-патриотический воспитаний рӱдерыште «Звезда» военно-спортивный сборын сменыже почылтын. Марий Эл гыч веле огыл, тыгак Камчатский край гычат 19 еҥ ты сменыш толын.
Парашют дене тӧрштынешт
Ты сменын ик организаторжо – Парашютный спорт федерацийын Марий Элысе организацийже. Тудым вуйлатыше О.В.Сысоева «Звезда» сменын ойыртемже нерген каласкален:
– Тыгай смене визымше ий эртаралтеш. 14-18 ияш ӱдыр-рвезе-шамычым «Звезда» сменыш ушнаш соцсетьлаште уверым вераҥдыме ыле, школлаш лектын коштмо.
«Звезда» эн ончыч авиационный направленностьшо дене ойыртемалтеш: йоча-влак парашютный технике дене палыме лийыт, а смене мучаште шкештат парашют дене тӧрштат. Лу кечаш программе пеш поян. Росгвардий управленийыш экскурсий дене миен толыт, кинолог-влак дене вашлийыт, спорт мероприятийлаште шкеныштым тергат, водолаз семын вӱд йымак пурат, скалодромышто занятийлаште лийыт, Изи Какшан эҥер дене катамаран дене ийын каят да молат. Икманаш, вӱдыштат, южыштат, курыкыштат мероприятий-влак эртаралтыт. Ӱдыр-рвезе-шамычым парашют дене тӧрштымаш утларак сымыстара, нунын тыгак водолаз лийын ончаш кумылышт уло. Тыгай сменыште каныше ӱдыр-рвезе-влак ончыкыжым аэроклубыш занятийлаш толыт, парашютный подготовко дене заниматлат, спорт дене кылым пеҥгыдемдат.
Икмыняр ий сменым эртарымеке шекланенам: йоча-влаклан тыште моткоч келша. Эше иктаж вич кечылан сменым шуяш лийже ыле манын шукын ойлат, чеверласымышт ок шу. Ты смене мучашлан участник-влак «укладчик парашюта» профессийлан тунем шуыт, тидыже военный специальностьлан шотлалтеш. Ты моштымашышт ончыкыжым армийыште службым эртыме годым кӱлеш лийын кертеш.
Тений эше ик сеҥымаш дене кугешнена – Президентын грантшым налаш конкурсыш ушнымо да военно-патриотический воспитаний направлений дене сеҥышыш лекме. Тыге 300 йочалан парашют дене оксам тӱлыде тӧршташышт йӧн лектын. 25 июль гыч лагерный сборым эртараш тӱҥалына, тушко республикысе военно-патриотический клуб-влакын лидерыштым ӱжына.
«Звезда» лагерь сменын эше ик организаторжо – Россий ДОСААФ-ын Марий Элысе пӧлкаже. Тудым вуйлатыше В.Н.Тихонов йоча-влак дене вашлиймаште шке таҥаш ӱдыр-рвезе-шамычлан да молыланат чыла шотыштат пример лийын кодаш ӱжын. «Тендан кокла гыч шукынжо парашют дене икымше гана тӧршта, тек тиде событий кужу жаплан шарнымашеш кодеш. Тиде лагерьыште жапым эртарымаш ончыкыжым чын илыш корным ойыраш полша манын ӱшаныме шуэш», – палемден Вячеслав Николаевич.
Михаил Васенин (фотошто — шола тӱрыштӧ) , Медведево посёлко:
– «Звезда» сменыште парашют дене тӧршташ лиеш манын пален налынам, да тышке ушнаш кумылем лектын. Эше Изи Какшан эҥерыште катамаран дене волымым пеш вучем. Элнан ончыкылык аралышыже улам, садлан тыгай сменыш ушнаш кӱлешак манын шонем, вет тыште налме шинчымаш да моштымаш ончыкыжым армийыште служитлыме годым кӱлеш лиеш.
М.Васенин Медведево посёлкысо 1-ше №-ан гимназийыште тунемеш, 5-ше классыш вончен. Рвезылан математике урок утларак келша, Миша ончыкыжым программист лияш шона.
Тора Камчатка гыч
Икмыняр шагат самолёт дене чоҥештеныт, автобус дене, варажым поезд дене кудалыныт – тыгай тора корным эртеныт Камчатский край гыч толшо участник-влак. Петропавловск-Камчатский оласе «Станция детского и юношеского технического творчества» ешартыш шинчымашым пуышо тӧнежыш коштшо рвезе-влак «Авангард» рӱдерыш нылымше гана толыт.
– Тылеч ончыч Рязань, Новосибирск, Владивосток олаласе военно-патриотический сынан сборлаште лийынна. Марий Элыште икшыве-влаклан пеш келша, садланак икмыняр ий почела тышке коштына. Нуно парашют дене тӧрштымым чон вургыжын вучат, авиабазыш экскурсий поснак оҥайын чучеш. Тыгай смене ӱдыр-рвезе-влакым сай могырыш вашталта, патриотизм шӱлышым вияҥда да элнан чын гражданинже лийын кушкаш полша, – манеш Камчатский край гыч командым вуйлатыше В.А.Перетрухин.
«Звезда» военно-спортивный сборын сменышкыже толшо йоча-влакын шинчашт чынжымак шӱдыр гаяк чолгыжын йӱлен. Вет лу кече жапыште нуно ятыр ойыртемалтше верыште лийыт, тӱрлӧ оҥай еҥ дене вашлийыт, шуко ум да пайдалым пален налыт.
Авторын фотожо-влак.