Пошкырт кундем Янаул район Рабак ялыште илыше Л.Дмитриева дене 2008 ийыште палыме лийынна. Тунамат, кызытат тудо тысе тӱвыра пӧртыштӧ пашам ышта. Мутат уке, латкок ийыште илышыштыже, пашаштыже ятыр вашталтыш лийын.
Тиде районысо Атлегач ялын ӱдыржо Рабак ялыш марлан толын. 1999 ийыште тӱвыра пӧртым вуйлаташ тӱҥалын. 2015 ийыште пенсийыш лектын. Ныл ий ончыч йӧратыме пелашыже ты тӱҥям коден каен. А кум ий гыч угыч пашаш лекташ йодыныт, да кӧнен. Кызыт Людмила культорганизаторлан пашам ышта, «Рвезе кумыл» мурышо-куштышо ансамбльым вуйлата.
Ныл шочшан ава
Ныл шочшан ава кызыт кум уныкан кова лийын. Кок кугырак ӱдыржӧ шке ешышт дене илат. А изиракышт Сарапулышто тунемыт. Инесса медицине колледжын пытартыш курсыштыжо шинчымашым пога, а Стелла – педколледжын дошкольный отделенийыштыже. Кодшо ийын ты кок ӱдыр Морко район Унчышто эртаралтше Марий самырык тукымын слётыштыжо лийын. А шкеже Людмила «Рвезе кумыл» ансамбль дене Йошкар-Олашке 2017 ийыште эртаралтше Пеледыш пайремыш толын коштын, эрвелмарий койышыжым ончыктен, сценыште мурен-куштен.
Мастар кид
Икымше тувырым Л.Дмитриева 2000 ийыште ик ансамбльыште куштышо ӱдырлан урген. Такшым марий ӱдырамаш шочшыжо-влаклан изишт годым эре сарафаным да тувырым урген чиктен. Концертыште чияш сӧрал вургем укеат, шкеак тӱрлен ончен. Чыла тиде пашам аваже полшымо дене шуктен. Вет изи Людукын аваже кажне гаяк Сабантуйлан вич ӱдыржылан тувырым урген пуэден, тудым тыглай тасма дене сӧрастарен. Пошкырт велне илыше эрвелмарий ӱдырамаш-влакын пайрем тувырышт лач тыгае лийын.
«А кодшо ийын июльышто кызытсе жаплан келшыше икымше тувырым шкаланем ургышым, – каласкала Людмила. – Варажым «Рвезе кумыл» ансамбльын эше кандаш участницыжлан ыштышым. Чыла тидым, 9 тувыр ден ончылшовычым, кум тылзыште ургенам да тӱрленам. Икгай вургем пеш моторын коеш. Утларакшым телым ургалтеш да тӱрлалтеш, кеҥежым кидпашалан жап ок сите. Тений январь гыч тӱҥалын апрель мучаш марте лу тувырым ямдыленам».
Людмила – Рабак ялыште шкетын урген тӱрлышӧ мастар. Тиде пашам колымшо ий шукта. Л.Дмитриева мыняр тувырым ямдылымыжым шотлен омыл, но шӱдӧ деч шукырак лиеш, манеш. Шӱдӧ утла еҥым мотор тувыр дене куандарымаш Людмилан чонжылан ласкалыкым пурта. Тек лывырге кидан еҥ-влак ончыкыжымат илышышкына поро кумылым шарат да кужу ӱмырым илат.