Икана рвезе мудреч деке миен да йодын:
– Айдемын мыняр йолташыже лийшаш? «Шӱдӧ теҥгет ынже лий, шӱдӧ йолташет лийже», – маныт калыкыште. Но мый шканем лӱмынак шуко йолташым кычалаш пижам гын, тиде пеш сайжак огылла чучеш. Адакшым чылаж годым айдемын могай улмыжым вигак умыленат от шукто: ала чын йолташлан огешат йӧрӧ.
– Йодышетлан вашмутым муаш полшем, – вашештен мудреч. – Чынрак каласаш гын, вашмутым шке кычал муат. Теве кӱкшӧ олмапум ужат? Тӱняште тиде ик эн кӱкшӧ олмапу. Пушеҥге вуйышто кечыше олмам мыланем кӱрлын пу.
Рвезе вуйжым кӱш нӧлталеш, олмам ужеш да ойла:
– Тиде чынжымак моткоч кӱкшӧ олмапу. Кузе мый тушеч олмам кӱрлын налам?
– А тый йолташетым кӱштӧ, пырля налыда.
Рвезе палымыжым ӱжеш, тудын вачышкыже шогалеш, но пушеҥге вуй марте шуаш ок лий.
– Уке, ом шу, – шӱлыкын ойла рвезе.
– Тетла йолташет уке мо? – шыргыж йодеш мудреч.
Рвезе эше икмыняр йолташыжым ӱжеш. Нуно пеҥыжыт, икте-весыштын вачышкышт шогалаш толашат, кӱшкыла шуйнат, но камвозыт, олмалан нигузе огыт шу.
Тидым эскерен шогымеке, мудреч рвезым шкеж дек ӱжеш да ойла:
– Ынде умылышыч, айдемылан мыняр чын йолташ кӱлеш?
– Да, умылышым, – сусыргышо пулвуйжым ӱштшыла ойла рвезе, – шуко кӱлеш, шукын веле чыла нелылыкым сеҥен кертына.
Мудреч вуйжым кок могырыш шӱлыкын рӱзалта:
– Очыни, туге, шуко еҥ кӱлеш. Але ик ушан еҥ, кудыжын вуйышкыжо ушан шонымаш толын пура ыле – тошкалтышым кондаш!