Кужэҥер районышто илыше Севериан Морозов шке лӱмжӧ нерген тыге воза:
– 1961 ий 30 августышто авана Таисия Егоровна республикысе эмлымверыште мемнам, кок йыгыр эргым, ыштен. Кужэҥер эмлымвер гыч тудым йочам ыштыме деч тылзе ончычак Йошкар-Олаш колтеныт – метрат пеле кӱкшытан ӱдырамашын мӱшкыржӧ пулвуй марте изиш шуын огыл. Тунам УЗИ системе эше лийын огыл, садлан врач-влак тидлан моткоч ӧрыныт. Тыге 30 августышто 13 шагатлан мый шочынам, а эше ик шагат эртымеке – шольым. Тунам авам эмлымверыште чылаштым ӧрыктарен: изи капан ӱдырамаш 9 килограмм наре нелытан кок йыгыр йочам ыштен! Мый 4 кг 250 г нелытан да шольым 4 кг 550 г нелытан шочынна.
Мӧҥгӧ колтымо деч ончыч врач-влак авамлан мыланна Юрий ден Герман лӱм-влакым пуаш темленыт. Вет 1961 ийыште Гагарин ден Титов космосыш почела чоҥештеныт. Но кована иканаште ойлен: «Нимогай Германым пуышаш уке! «Герман-влак! Гитлер» – лӱмдылаш тӱҥалыт!» Тунам фашист Германий ден сар нерген кочо шарнымаш чот виян лийын. «Юрийже йӧра, кокымшыжлан ынде могай лӱмым пуэна?» – йодын ачам. «Северианым! Мотор лӱм. «Сивук!» шыман да марла шокта», – иктешлен ковам. Пошкудо Лопсолаште родына-влакат эргыштлан тыгай лӱмым пуэныт улмаш.
Севериан улмемлан нимынярат ом ӧкынӧ. Тыгай мотор, ойыртемалтше лӱмемлан куанем гына. Лӱмем дене кылдалтше оҥай историйже мыняр лийын!
С.Морозовын альбомжо гыч налме фото.