Йошкар-Олаште илыше да ятыр ий игечым эскерыше Геннадий Рыбаков палдара:
– Кеҥеж эртенат кайыш. Но каласыман, Марий Элыште тудо эркын дене кужемеш – май ден сентябрь тылзе-влакымат тушко пурташ лиеш. Шукыж годым кеҥежым майысе гаяк температур шога. Мутлан, тений майыште шокшо лийын, кеҥежат шокшо игече дене куандарен. Пытартыш 30 ийыште кеҥежым кокла шот дене 18,1 градус шокшо шога, сентябрьыште – 11,4 градус. А тений сентябрьыште 12 градус леве лийшаш. Сентябрьысе температур кеҥежымсе деч чотак огеш ойыртемалт.
40-60-80 ий гыч шошо ден кеҥеж, кеҥеж ден шыже коклаште «чек» йӧршеш вашталт кертеш – игече левешт толеш. Шыжат кӱчыкемеш, октябрь-ноябрь тылзе-влак гына кодыт. Пытартыш 30 ийыште октябрьыште кокла шот дене 4,5 градус леве лийын, а октябрьын икымше пелыштыже – 6,6 градус, ноябрьыште 3 градус йӱштӧ шоген.
Теле тений утыжым йӱштат, леват огыл лийшаш.