3 июньышто Удмуртийысе Алнаш район Маскаялыште Семык эртаралтын. Тыште тыгай пайрем 2002 ийыште лийын улмаш.
Семык кок кече шуйнен. Икымшыжын калык верысе отышко кумалаш тӱшкан лектын.
Семыкын кокымшо кечышкыже Пермь край, Киров область, Удмуртий, Марий Эл да Татарстан гыч уна-влакымат ӱжыныт. Концерт программым сӧрастараш Марий кундем гыч «Кушна мланде» ансамбль, Олег Бакутов ден Ольга Леухина миен коштыныт. Семык пайремыш миен коштмыж нерген Ольга тыгерак каласкалыш:
– Удмуртийыш ме 2 июньышто миен шуынна. Кастене репетицийым ыштышна, пайрем ӱстембаке кочкышым ямдылаш полшенна. Тыгак чевер тӱсан шуко шарикым пуэн овартыльна. Паша тич ыле. Йӱдым кугу йӱр лийын, кочмыверлан ямдылыме палаткым мардеж наҥгаен сӱмыртен, тент дене келыштарыме сценат эрдене мландывалне киен, кӱртньӧ конструкцийже иралтын да кӱшылжӧ сцене ӱмбаке камвозын.
Эрдене Удмуртий Республикысе кучемын еҥже-влак толыныт да Семыкым вес верыште, Алнаш районысо тӱвыра пӧртыштӧ, эртарена манын каласеныт, вет йӱр 10 шагат марте чарнен огыл. Марий-влак тиддене келшен огытыл. Кум тылзе ямдылалтмеке, кузе чыла тидым вашталтат манын тургыжланеныт, шинчавӱдыштат лектын.
Олег Бакутов, Семыкым Маскаялыште вашлияш манын, кӱлешан еҥ-влак дене вашкылым муын да сценым угыч шындаш, тӧрлаташ кӱштен. Тыгак лийын: ялыште илыше-влак йӱр йымалне кум шагат сценым да моло верымат ямдыленыт.
Латкок шагатлан Семыкым торжественно почмо. Пайремыш тӱрлӧ делегаций толын, тӱжем наре еҥ погынен.
Семыкыште мыланем кидмастар-влакын ончерышт келшен. Шке кид дене ыштыме арвер-влак пеш мотор ыльыч. Тыгак Удмуртийысе ик тоштер книга ден фото ончерым конден. Марий семӱзгарым ик палаткыш посна верыште чумырымо ыле. Тушто шӱвырым, тӱмырым, кӱслем да молымат шоктымым колышт шогенам, сӧралын шоктен.
Марий йӱла почеш пучымышым кочкаш тӱшкан каенна. Игече мотор шоген, кава оярен, кече лектын. Марий калыкын весела кумылышт, порылыкышт шижалтын. Марий тӱрлеман вургемым чийыше-влак ятырынак ыльыч. Кок илалше ӱдырамаш йолышкышт меж носким чиеныт, йыдалым пидыныт. Мланде изиш ночкырак ыле, туфлемат лавыргыш, но тиде кумылым волтен огыл.
Верысе калык Удмуртийысе марий-влакын национально-культурный автономийыштым вуйлатыше Анатолий Ильич Радыгинлан кугу таум каласен. Тудын тыршымыжлан кӧра Маскаялыште у асфальтым шарыме.
Удмуртийыште Семыкым ешын пайремжылан шотлат. Тыште самырык ӱдыр ден рвезе-шамыч палыме лийышт, варажым мужыр-влак ушнышт, марий еш-влак шукемышт манын шонат. Садланак Семык годым «Марий еш» конкурс эртаралтын. Тушто шым еш участвоватлен. Нуно вӱдвара дене вӱдым нумалыныт, кандырам шупшыныт да моло шотыштат таҥасеныт.
Вес ийын Семыкым Грак район Марий Вожайыште эртараш палемденыт.
Эльвира Терентьева.