«Студентын идалыкше» Российысе национальный премийын регионысо этапше мучашлалтын.
Тений участник-влакым куд индивидуальный да ныл коллективный номинацийла дене акленыт. Конкурсын ссуз-влак коклаште заочный этапыштыже 47 еҥ лийын, тушеч очный этапыш 30 студентым ойыреныт. Финалыште конкурсант-влак эше кок тергымашым эртеныт: номинацийышт дене презентацийым ыштеныт, эксперт-влак дене мутланеныт.
«Идалыкын общественникше» премийым И.К.Глушков лӱмеш Оршанкысе шуко профилян колледж гыч Дарья Пунгина налын. «Идалыкын старостаже» премий дене ты колледжынак студенткыже Софья Свинцова палемдалтын. «Идалыкын профессионалже» лӱм Йошкар-Оласе строительный техникум гыч Милана Петровалан логалын. «Идалыкын творческий личностьшо» лӱм И.С.Палантай лӱмеш республикысе тӱвыра да сымыктыш колледж гыч Анна Коротковалан пуалтын. «Идалыкын спортсменже» номинацийыште Олимпийский резерв училищын студентше Егор Кузнецов сеҥен. Нуно ынде Марий Элын чапшым Российысе конкурсышто заочный да очный этаплаште аралат.