Российысе «Без срока давности» сочинений-влак конкурсын регионысо йыжыҥжым иктешленыт. Тудым Кугу Отечественный сарысе событий-влакым да тушто эҥгекыш логалше-шамычым шарныме да ӱмыраҥдыме амал дене эртарат.
2023-2024 тунемме идалыкыште конкурсым школ, район, регион да эл кӱкшытыштӧ эртараш палемдыме. Тений тушко республик гыч 1223 тунемше ушнен. Кундемыштына конкурс 2023 ий 1 ноябрь гыч 2024 ий 17 февраль марте каен. Тушко районлаште сеҥыше-влакын 43 сочиненийыштым ойырымо. Тыге регионышто сеҥышыш Йошкар-Оласе 7-ше номеран школын 9 «А» классыштыже тунемше Александр Зуев лектын. Туныктышо-наставникше – Н.В.Жубрина.
Наталья Викторовна ты школым вуйлата, руш йылмым да литературым туныкта. Туныктышо ден тунемшым сеҥымаш дене саламлена!
Йошкар-Оласе 7-ше номеран школын сайтше гыч налме фото.