Hiite Maja («Шнуй вер-влакын пӧртышт») Эстонийысе учреждений тӱнямбалысе фотосӱрет конкурсым тений 13-шо гана эртарен. Тушко кажне кумылан ушнен кертын.
Тӱҥ йодмашыже – фотосӱретыште пӱртӱсын шнуй верже лийшаш. Тиде конкурсыш 21 эл гыч тӱжем утла паша пурен. Жюри кум номинаций дене аклен: тӱҥ премий, урал калыкын премийышт да 16 ий марте самырык фотограф-влаклан премий.
Кумшо номинацийыште Марий Эл гыч 10 ияш Радимир Козлов сеҥен. Тудо Оршанке район Кугу Ӧрша ял воктенысе куэрла кӱсотым войзен. Рвезылан 200 евром пӧлеклат.