Москосо Йошкар площадьыште лийшашлык Сеҥымаш парадыште 200 волонтёр пашам ышташ тӱҥалеш. Доброволец-влак радамыш логалаш лӱмын конкурс эртаралтын. Сеҥыше-влак коклашке Йошкар-Олаште илыше марий ӱдыр, 17-ше №-ан школышто англичан йылмым туныктышо, директорын воспитаний шотышто советникше Ольга Пидыбаева логалын. Марий Эл гыч тудо да эше кок еҥ Москошко кугу парадыш каят.
Шочмо кундемыш пӧртылын
Ольга Параньга район Элнет селаште шочын. Кок ияш улмыж годым ешыже Волгоград кундем Калачёвский район Береславка посёлкыш илаш куснен. Посёлкысо кыдалаш школым шӧртньӧ медаль дене тунем пытарымеке, 17 ияш ӱдыр Н.Крупская лӱмеш пединститутыш руш йылмым да литературым, англичан йылмым туныктышо специальностьлан тунемаш пурен. Но кумшо курс деч вара МарГУ-ш йот йылме-влак факультетыш куснен. Эн ончыч бакалаврым тунем пытарен, вара – магистратурым.
Шочмо мландын куатше, пӱртӱс моторлыкшо, поро еҥже-влак Ольгам сымыстареныт. Самырык еҥ Йошкар-Олашкак илаш кодын. Тудо кажне кеҥежым ача-аваж деке Волгоград кундемыш миен коштеш, а нуно отпускышт годым ӱдырышт деке унала толыт.
Тӱнямбал тренер
– Кандаш ий ончыч 17-ше №-ан школыш пашаш толмеке, йоча-шамыч дене пырля «Блокада Ленинграда» квизыште (интеллектуально-развлекательный модыш) участвоватленна. Тиде патриотический модмаш моткоч келшен. «Сеҥымаш волонтер-влак» движенийыш шкеат ушнаш кумылаҥынам. Сеҥымаш парад, Георгиевский тасма, Курымашлык полк да патриотизм шӱлышан ятыр мероприятийыште участвоватленна. Тиде паша чонемлан келша, – ойла Ольга.
Ӱмаште О.Пидыбаевалан Марий Элысе патриотический воспитаний да спорт рӱдер гыч йыҥгыртеныт да Сеҥымашлан 80 ий теммылан пӧлеклалтше тӱнямбал волонтёр корпусын тренержылан конкурсышто участвоватлаш темленыт. Ольга келшен да Москошто октябрьыште эртаралтше Сеҥымаш волонтёр-влакын тӱнямбал форумыштыжо лийын. Тусо туныктымо программыште келге шинчымашыжым, пӱсӧ уш-акылжым да тӱҥжӧ патриот улмыжым ончыктымылан кӧра тӱнямбал тренер статусым налын кертын.
– Волонтёр паша мыйын илыш рӱдышкӧ савырнен. Тӱрлӧ мероприятийыште чӱчкыдын участвоватлем. Теве, мутлан, шукерте огыл 17-ше №-ан школышто 9-11 класслаште тунемше йоча-влак да кум туныктышо, чылаже 90 еҥ, «Сеҥымаш диктант» тӱнямбал акцийыш ушнен. Акцийым эртараш сеҥымашын волонтёржо-влак полшенна, шкежат диктантым возенна, – каласкала О.Пидыбаева.
Ольга йоча-шамыч дене веле огыл, кугурак еҥ-влак денат пашам ышта, Сеҥымашын волонтёржо движений дене палдара да поро пашам ышташ кумылаҥдаш тырша. Пашам ыштыме школыштыжо волонтёр отряд уло. Тушко коштшо йоча-влак наставникыштлан исторический урокым, тӱрлӧ темылан квизым эртараш полшат. Тидын дене ӱдыр-рвезе-влак шкештат Российын историйжым сайрак палаш тӱҥалыт.
Сеҥымашын волонтёржо 14 ияш деч кугурак ийготан кумылан чыла еҥ лийын кертеш. Йодмашым волонтёрыпобеды.рф. официальный порталыш колтыман. Регистраций деч вара доброволец-влак онлайн да очно тунеммашым эртат. Тушто Кугу Отечественный сарын историйжым шымлат. Педагог, тренер-влак тӱрлӧ кредалмаш, герой-влак нерген каласкалат, тусо жапын культуржо дене палдарат.
Окно 2015 ийыште Россий мучко Кугу Отечественный сарыште сеҥымылан 70 ий темме лӱмеш волонтёр корпус-влак ышталтыныт. Доброволец-влакын пашажым кӱкшын акленыт, да тыге «Сеҥымашын волонтёржо» Всероссийский мер движений шочын. Тунам тушто 136 тӱжем еҥ шотлалтын. Кызыт организацийыш 60 эл гыч 900 тӱжем утла волонтёр пурен. Марий Элыште сеҥымашын волонтёржо радамыште 3300 наре еҥ.
Кугезе кочаже нерген
Сеҥымашын волонтёржо шке кугезе кочаже Егор Степанович Пидыбаев дене кугешна.
– Тудын нерген ачамын мутшо гыч веле палем. Егор Степанович – Морко район Унчо селан шочшыжо. Моско областьыште кредалын, Берлин марте шуын. Но сар пытымеке, мӧҥгӧ пӧртылын огыл. Украина мландыште илаш кодын. Тушто ешым поген. Специальный военный операций тӱҥалме деч ончыч соцкыл полшымо дене родына-влакым кычалын муынна. Но кылна вара йомын, – палдарыш Ольга.
О.Пидыбаева аважын могырым кугезе кочаже нерген кызыт пален налаш тырша. Тидлан лӱмын Кугу Пумарий селаш (лачак тушто аваже шочын-кушкын) миен толнеже.
Парадлан ямдылалтеш
Школ, волонтёр паша деч посна Ольга Москош Сеҥымаш парадыш каяш ямдылалтеш. Тудо манеш:
– Кызыт онлайн тунемына. Куратор-шамыч парадыште участвоватлыше доброволец-влак деч ветеран родышт нерген информацийым да фотографийым йодыныт. «Курымашлык полкыш» меат ушнена, шонем. Волонтёр-шамычым командылан шелыныт. Ик командыште – тӱрлӧ ола гыч 22 участник. Ме кызыт интерактивный заданий-влакым шуктена, мутлан, Кугу Отечественный сарыште лийше полководец-влак нерген оҥай увер-влакым кычалына, викториным эртена. Мыйын командыште Луганск, Севастополь, Донецк гыч волонтёр улмо нерген палем. Эн самырык участниклан 18 ий, а эн кугурак доброволец – 50 ийым эртыше. Кызытеш парадыште могай пашам ышташ тӱҥалына, раш огына пале. Москошто лиймеке, куратор-влак кажныжын сомылжо нерген каласкала. Ӱмаште лийше волонтёр-влакын мутышт почеш, доброволец-влак парадыште веле огыл полышкаленыт, тыгак Москосо «Поклонная гора» мемориальный комплексым ужыныт. Ӱшанем, меат тушто лийына.
О.Пидыбаеван альбомжо гыч налме фото.