Кӧмытын ешышкышт «сар» шомак тӱкалтен, нунылан ты мутым колаш, палем, чот неле. Чоныштышт мом ышталтмым шижаш чылалан пӱралтын огыл гынат, икоян да вашла полшаш ямде улмына дене, сеҥымашке шуаш манын, кеч-могай да надырым ыштен кертына. Куандара, кундемыштына чыла гаяк районышто илыше еҥ-влак СВО-што улшо землякна, родо-пошкудына-шамычлан тӱшкан гуманитарный полышым погат: пижым, носким, маскировочный сеткым пидыт, оксам поген, тÿрлö кочкышым, техникым, арулык сатум да моло арверым наледат.
Мобилизацийым увертарыме деч вара Марий Элысе кажне гаяк ял гыч рвезе-влакым СВО-ш наҥгаеныт. Параньга район Усола ял гыч передовойышто Е.Г.Захаров кредалеш. Тудлан да моло рвезе-влаклан иктаж-мо дене полшаш манын, ялысе калык, тӱрлӧ сатум наледен, гуманитарный полышым колташ кумылаҥын. Ты сомылым нуно марий рвезе-влакын Ульяновск олаште учебкыште лиймышт годымак шукташ тӱҥалыныт. Мобилизоватлалтше-влакым бой кайыме верлашке колтымекышт, поро пашам шуктымо сомыллан эшеат чот пижыныт. Военный техникым тушман-влак деч шылташ манын, маскировочный сеткым пидаш лÿмынак тунемыныт. Тидлан Усола ялын чолга еҥже Галина Рублёва Шернур посёлкышто тыгай сеткым пидше-влакын штабыштым вуйлатыше Снежана Богданова дене кылым ыштен.
(Г.Рублёва ден Л.Чумаева)
Штаб Шернур посёлкысо Михаил Архистратиг лӱмеш храмын ик пӧлемыштыже верланен. Тушко чыла кумылан еҥ кертмыж семын сеткым пидаш коштеш. Сеткым пидше еҥ-влаклан шокшо кочкышым, чайым храм пелен ямдылат. Икманаш, иктат шужен пашам ок ыште. Ончычшо Усолаште илыше-влакат тушко кудалыштыныт. Варажым Г.Рублёва сеткым пидаш йӧнан верым мӧҥгыштыжӧ пелашыжлан ыштыктен. Ынде Усолаште илыше-влак шке ялыштыштак ты сомылым шуктат.
– Мемнан тӱҥ задачына – элнан армийжлан полшаш. «Ме огыл гын, кӧ?» девиз почеш илена. Вет СВО-што ачана, изана, шольына-влак тыныслык илыш верч геройла шогат. Ӱшанена, нуно сеҥымаш дене пӧртылыт, чылаштым вучена! А ме полшаш эре ямде улына.
Женя шольым дене кыл улмо годым вашла йыҥгыртена, иктаж-могай полыш кӱлеш гын, ит ӧр, йод, манам. Тудо, конешне, утыжым йодаш аптырана, но маскировочный сеткым пидаш йодын ыле. Мемнан частьыш тынарым, весыш, кумшыш тыгак колтеда гын, кугу полышым ыштеда манын.
Ты сомылым шукташ йӧнарак лийже манын, мӧҥгыштӧ верым лÿмын келыштаренна. Вес районыш кудалышташ шукыштлан йöнанжак огыл. Паша ушнен толжо манын, самоварыште чайым шолтена, пырля мурым мурена, мыскарам ыштылына. Пидаш кумылан-влак яра жапышт годым кеч изишлан да толын каят. Южышт кечыгут манме гаяк пидын кертыт. Куандара, ты пашаш изижге-кугужге ушненыт. Йоча-влак гын, сеткым пидаш полшат гын, салтак-влак мöҥгышкышт вашкерак толыт манын шонат. Садлан нунат полшаш ямде улмыштым кумылын ончыктат.
Сеткын лопкытшо кум метран, кутышыжо куд метран. Пидме материалат шулдыжак огыл. Материалым налаш еҥ-влак оксам шке кумылын колтат, южгунам спонсор-влакат лектыт. Усола ял Шернур посёлкысо маскировочный сеткым пидше штабын ик укшыжлан шотлалтына. Мемнам Снежана Витальевна куьироватла, – каласкалыш Г.Рублёва.
Шернур посёлкысо храмыште верланыше тӱҥ штабын укшыжо-влак ты посёлкысо рӱдӧ книгагудо пеленысе добровольчество рӱдерыште, Кукнурышто, Кучанурышто, Параньга Усола ялыште, Кужэҥер, Марий Турек районлаште улыт. Храмыште тыгак сеткым пидаш тӱҥ материалым ямдылат: лентым пӱчкедат да моло сомылым шуктат. Вара нуным штаб пелен тыршыше тӱрлӧ верлашке колтедат. СВО-ш пидме сетке-влакым ятырак колтеныт. Боец-влак деч йодмаш пурымым веле вучат, а йодыт кызыт шуко.
– Ик арняште шкетын вич сеткым пидынам. Конешне, мыняр шукырак пашаче кид уло, тунар ятыррак пидаш лиеш. Август – телылан ямдылалтме тылзе, шукынжо шапашым ямдылат да сурткöргысö моло сомылым шуктат. Кертмышт семын мӧҥгыштӧ уке улмем годымат толын каят, – мане Галина.
Поро пашам шукташ кумылан еҥ-влакым тыште эреак вучат. Пашаче кидын кӱлешлыкше пытартыш жапыште моткочак шижалтеш. Тидын дене ме передовойышто улшо салтак-влакын илышыштым арален кодаш полшен кертына. Кумылан еҥ-влак ушнаш шонат гын, кӱшнӧ ончыктымо точкылашке шке лектын кертыт. Лач икоян улмына дене ме сеҥымашым лишемден да салтакна-влаклан кугу шÿкалтышым ыштена. Чылажат – сеҥымаш верч!
Г.Рублёван фотожо-влак.