Вес каныш кечылаште, 22 да 23 мартыште, Марий Турек, Медведево, Советский да Кужэҥер район-влакын усталык коллективышт выступатлат. 7 май – ыште «Сеҥымаш тулсавыш» фестиваль гала-концерт дене мучашлалтеш.
Республикыштына «Сеҥымаш тулсавыш» фестиваль умбакыже шуйна. Эртыше каныш кечылаште Йошкар-Оласе Сеҥымашын ХХХ идалыкше лӱмеш тӱвыра полатыште Козьмодемьянск ден Волжск ола-шамычын да Морко ден Курыкмарий район-влакын усталык коллективышт мастарлыкыштым ончыктышт.
Козьмодемьянск ола «Сеҥымашын симфонийже» концерт программым ямдылен. Тудым землякна, кумдан палыме семмастар Андрей Эшпайын илыш корныж гоч почын ончыктен. Вет Андрей Эшпайын шочмыжлан тений 100 ий темеш.
А.Эшпайын Шочмо элым чот йӧратымыжым, тудын верч азапланымыжым да илышыжым пуаш ямде улмыжым Кугу Ачамланде сарыште кредалмыже веле огыл пеҥгыдемда. Уста еҥ ача-аважым, шочмо мландыжым жаплымым тӱрлӧ произведенийыштыже ончыктен. Тудын музыкшым элыштына веле огыл, тӱнямбалне палат.
Концерт программым ямдылыме годым тӱҥ шотышто музыкантын произведенийже-влаклан эҥертыме. Кажне номер могай гынат шижмашым, пӱрымашым почын ончыктен. Мутлан, «Мистерия танца» хореографий студий «Тыйын почешет» куштымашым шынден. Номерыште салтакын кительжылан тӱткышым ыштыме. Тудо специальный военный операцийыште участвоватлыше салтакын, кудыжо кызытат мемнан тыныслыкна верч кредалеш. Тидыже 80 ий утла ончычат да кызытат кажне салтак мемнан шӱмыштына улмым пеҥгыдемда. Кажне номер йӧратымашым, шарнымашым, сеҥымашым артистшамыч дене пырля илен лекташ да шижаш таратен.
* * *
Морко районын усталык коллективше-влак «Эхо Победы. 80 лет памяти» театрализоватлыме концертышт дене фестивальым шуйышт.
«Ялыште тыныс жап» мурымашан да куштымашан весела номер сар годсо кочо тат нерген шонымашым ик жаплан мондыктен. Сцене гыч йоҥгышо сылне сем илышын, чынжымак, кажне татшым илен моштыман манын ушештарен. Ял калыкын тыныс илышыжым сар тӱҥалме нерген увер «кӱрлын». Ты неле пагытыште калык мом чытымым да кузе илымым тӱрлӧ произведений гоч ужаш да шижаш лийын.
Концерт программым ямдылыме деч посна тӱвыра полатын кокымшо пачашыштыже кок район дене палдарыше «Всем миром о мире» ончер да «Жизнь – подвиг» фотоончер пашам ыштен. Тушто верысе кидмастарвлакын пашашт дене лишкырак палдареныт, шке кид дене ыштыме сеҥымашым лишемдаш полшышо техникым ончыктеныт, сар годсо тӱрлӧ арверым да савыктышым чумыреныт. Туштак изирак келыштарыме сценыште Морко районысо Коркатово тӱвыра пӧртын пашаеҥже, верысе «Куан памаш» ансамбльын солистше Валентина Егорова кӱсле сем почеш сар годсо муро-влакым йоҥгалтарен.
* * *
Волжск оласе усталык коллектив-влак «В каждом из нас есть частица России» концерт программым ямдыленыт. Айдемын чоныштыжо я куан, я ойго озалана гын, тудо я мура, я кушта. Сандене программышт муро да куштымашлан моткоч поян лийын.
Волжск оласе «Чистый голос», «Живая вода», «Созвездие детства» вокал ансамбльвлакын мурымышт годым ончаш толшо-шамычат почешышт шыпак мурен шинченыт. Вет муро-влакын («Дорога на Берлин», «Катюша», «У реки Дуная», «Память») мутышт кажнылан палыме да лишыл.
Концерт годым поснак йоча-шамыч куандарышт. «Ромашки» калык куштымаш ансамбль, «Артес» образцовый шоу-группо, «Школа танца» образцовый хореографический ансамбль ятыр куштымаш гоч сарын корныжо, айдемын чоншижмашыж нерген каласкаленыт.
* * *
Я.Эшпай лӱмеш «Шанс» калык тӱвыра рӱдерын участницыже Есения Дорошенко «Оборванного мишку утешала…» почеламутшо дене шукыштын шинчавӱдымат луктын, вет тушто орлыкыш логалше, тулыкеш кодшо йочашамыч нерген ойлалтеш.
Видеом уныкан СВО-што улшо ачажлан серышым возымо дене мучашленыт. Дмитрий Захаров, Ирина Ларкина, Ольга Максимован «Ярдымы вырсы» («Проклятая война») мурым мурымышт годым СВО-што вуйым пыштыше Герой-влакын фотоштым экраныште ончыктеныт. Концертым ӱшаным кондышо «Машина Победа» муро дене кошартеныт.
Елена ГОДУНОВА, Дарья БЫКОВА.
И.Речкинын да М.Скобелевын фотошт.