Йошкар-Оласе Самырык-влакын полатыштышт Марий Элым Вуйлатыше Ю.Зайцевын «Сеҥымашан почто» проектышкыже ушнышо-влакым торжественно саламленыт.
Тушто ты проектын кураторжо, Марий Эл Республикын министрже, Марий Элым Вуйлатышын полномочный представительже Т.Манджиева, Молодёжный политике комитетын председательже С.Игошин лийыныт. Мероприятий годым волонтёр ден организатор-влаклан Ю.Зайцевын тауштымашан серышыжым кучыктеныт.
«Сеҥымашан почто» проект СВО-што улшо герой салтак-шамычлан шкешотан полышым пуаш еҥ-влакым кумылаҥдаш ышталтын.
Салтак-влакын патриотизм шӱлышыштым нӧлташ манын, поро шомакымат каласен моштыман. Садланак Ю.Зайцевын темлымыж почеш проектлан тӱҥалтышым 12 июньышто (Российын кечыжым палемдыме годым) пуымо. Тудо 31 август марте шуйнен. Ты жапыште проектын площадкышкыже 15 тӱжем утла еҥ толын. Нуно 1570 утла серышым возеныт, 400 утла талисманым ыштеныт. «Мемнан Геройна-влак» фотоончерыште 82 Геройын фотокартычкыжым ончыктеныт. Тылеч посна интерактивный площадке-влак пашам ыштеныт. Тыге, мутлан, «Сеҥымашан почто» площадкыште проект дене палдарыше палаткым вераҥденыт. Тушто кундемыштына илыше да уна-влак деч салтак-шамычлан возымо серышым погеныт. Тыгак ушнаш шонышо еҥ-влаклан площадкыштак серышым возаш ямде бланкым ямдыленыт.
«Мастер-класс» площадкыште йоча-шамычлан талисманым ышташ лӱмын трафаретым ямдыленыт. Нуно 3D-ручка дене талисманым кӱчык жапыште ыштен кертыныт. Талисманым шкалан кодаш йӧн лийын але СВО-н участникшылан колташ волонтёрлан пуыман ыле.
«Мемнан Геройна-влак» площадкыште кок кугу экраныште Герой-влакын фотокартычкыштым шыҥдарыме. Нунын подвигышт, биографийышт, наградышт нерген кумданрак пален налаш манын, сенсор кнопкым темдалын, кӱлеш информацийым кычалаш йӧным ыштыме. Фотоончерыште волонтёрын, СВО-што улшо-влаклан полшышо еҥ-шамычын фотоштым вераҥдыме.
Интернет гыч налме фото.