Йошкар-Оласе Рӱдӧ паркыште верланыше Воин чап монументым 1975 ийыште скульптор Анатолий Ширнинын проектше почеш ыштыме. Тудым Сеҥымашын 30 ияш лӱмгечыжлан ямдылыме.
Памятникым шемалге-кӱрен тӱсан пеҥгыде кӱ (гранит), бетон, таптыме вӱргене гыч ыштыме. Коло метран пилоным сеҥыше-салтакын куд метран фигурыж дене келыштарыме. Совет салтакын ончыко лӱддымын кайымыжым кидыштыже нӧлталын кучымо автоматше, шеҥгелне вӱдылалт кечыше плащ-палаткыже почын пуат. Автор ты пашаштыже Шочмо эл верч калыкын подвиглан ямде улмыжым, йӧратымашыжым да пагалымашыжым ончыктен.