16 февральыште Марий Эл Республикысе Калык-влакын Келшымаш пӧртыштӧ «Всё для Победы! МарГУ: связь поколений» тӱнямбал форумым почмо.
Тудо Украиным фашист-влак деч утарымылан 80 ий теммылан пӧлеклалтын. Форумышто учёный, кугыжаныш да мер пашаеҥ-шамыч, тоштерыште, тӱвыра да образований тӧнежлаште тыршыше-влак, журналист, студент, аспирант да тунемше-шамыч лийыныт. Нуно самырык-влакым патриотизм шӱлышеш куштымо нерген каҥашеныт.
Погынышо-влакым Марий Элым Вуйлатышын лӱмжӧ дене республикысе Правительстве Председательын икымше алмаштышыже М.Васютин саламлен да каласен:
– Патриотизм шочмо мландым, элым тыглай гына йӧратымаш огыл, а кӧргӧ илыш позиций. Тиддеке кажныже толеш, кӧ Российым Шочмо элжылан шотла.
Вес кечынже «Наставничество&поиск» регион-влак кокласе кокымшо слёт эртаралтын. Тудо уло Россий гыч поисковый отрядласе 100 боецым иквереш чумырен.
Э.Терентьева.
Фото: Д.Речкин/ Марий Элым Вуйлатышын пресс-службыжо.