Марий Эллан – 100 ий
Тиде парк В.И.Ленин лӱмеш тӱвыра полат шеҥгелне, мотор верыште верланен.
Парклан негызым 1946 ийыште пыштыме. Ондак тыште Берёзовский шӱгарла улмаш. 1977 ийыште В.И.Ленин лӱмеш тӱвыра полатым чоҥеныт. 2009 ийыште паркым пӱтынек уэмыме. Тоштемше, черле пушеҥге-влакым руэныт. Вара тышке Т-55 танк ден ЗИС-3 пушкым шогалтеныт. Ик жап гыч кок гаубица ден адмиралтейский якорьым конденыт. Кугу Отечественный сар годым тылыште тыршыше-влаклан парк покшелне памятникым шогалтыме.
2015 ийыште паркыште спорт дене заниматлаш шуко площадкым ыштыме. Июньышто скейт-парк (велосипед, самокат, скейтборд, ролик дене тӱрлӧ упражненийым ыштылаш) почылтын. Тушто кеч-кӧ яра заниматлен кертеш. Сентябрьыште воркаут-площадке пашажым тӱҥалын, кеч-кӧ тӱрлӧ тренажерышто яра заниматлен кертеш. Паркыште каналташ шуко теҥгылым вераҥдыме, кеҥеж гоч мотор пеледыш-влак кушкыт.