«Мемнан Сеҥымаш кечына» (Наш День Победы) акцийыш Ульяновск область ушнен. Россий президентын Юл кундем федеральный округысо полномочный представительжын темлыме акций нерген Интернетыште материал-влак #песнипобедыПФО #нашденьпобеды хештег дене шыҥдаралтыт.
«Сеҥымаш кече» мурым мурымашке тыште кум тукым ушнен. Лӱмлӧ мурызо-влак дене пырля самырык-влак йоҥгалтарат: Кугыжаныш куштышо да мурышо «Волга» ансамбльын да Россий Федерацийын калык усталык «Соловушка» лӱмлӧ ансамбльын артистше-влак дене пырля «Волонтеры Победы» мер толкынын самырык еҥже ден Ульяновский кугыжаныш педагогический университетын студентше-влак мурат.
Видеороликым элыштына мӧҥгыштӧ шинчыме режимым увертарыме марте возымо.
Ульяновец-влак Кугу Отечественный сар жапыште фронтыштат, тылыштат лийыныт. Ульяновскыш автомобиль заводым эвакуироватленыт, сар пуламыр годым тушто 7,8 тӱжем автомашинам погеныт. Кажне кумшо патроным тысе Володарский лӱмеш патрон заводышто лукмо манын палемдат. Тушман ваштареш кучедалше кажне нылымше шинель Ульяновскысо фабрикылаште ургымо. Тысе 26 госпитальыште 133 тӱжем офицер ден салтак эмлалтын.
Ульяновск кундем гыч оружейник Алексей Судаевын лӱмжӧ шукылан палыме: тудын шонен лукмо автоматшым II-шо Тӱнямбал сарын эн сай саркуралжылан шотленыт. Цильнинский район гыч Петр Усачевын лӱмжӧ денат Сеҥымаш кече кылдалтын. 1945 ий 9 майыште тудо Рейхстагын зданийыштыже кидпалыжым пыштен – Кугу Сеҥымаш датым палемден коден. Тиде фотографий варажым уло тӱня мучко шарлен.
Ушештарена: 8 май марте Юл кундем федеральный округысо чыла регионышто «Сеҥымаш кече» муро йоҥгалтеш. А 9 майыште марафон иктешлалтеш. «Мемнан Сеҥымашна» («Наш День Победы») акцийыш але марте Мордовий, Марий Эл, Удмуртий, Башкортостан, Самара область да Татарстан, Нижегородский область, Пермь край ушненыт. Саратов деч вара эстафете Ульяновск областьыш кусаралтын.
Сайт ден социальный сетьлаште проект нерген #нашденьпобеды, #песнипобедыПФО хештег гоч пален налаш лиеш.