Сеҥымаш дене пӧртылыныт

Марий Эл Республикысе Образований да науко министерствын соцкылже гыч налме фото.

Юл кундем федеральный округысо уш-акылым пойдарыме олимпиаде Пермьыште эртаралтын. Таҥасымашыш Марий Эл гычат тунемше-влак ушненыт.

Тушко Юл кундем федеральный округын 14 субъектше гыч талантан ӱдыр-рвезе-влак погыненыт. Олимпиаде вич направлений почеш эртаралтын. Йошкар-Оласе «Инфотех» лицейын тунемшыже-влак Артём Садовин ден Дмитрий Катягин «Робототехнике» направлений дене сеҥышыш лектыныт гын, Константин Калинин ден Роман Хуснулин беспилотный летательный аппаратым программироватлымаште ойыртемалтыныт.

Олимпиаде годым тыгак вашлиймаш, экскурсий, таҥасымаш-влак лийыныт.