Тыге лӱмден ыле «Сеҥымаш тулсавыш» фестивальыште ончыктымо концертшым Марий Турек район.
Фестивальыш шуко тунемше-влакым ушымо дене тудо моткоч сайын ончалте. Концертым Марий Турек посёлкысо Йоча сымыктыш школын руш калык семӱзгарже дене шоктышо «Корни» образцовый оркестр почо, вуйлатышыже – В.Камышева. Вара преподаватель-влакын «Кантилена» мурышо ансамбльже «Балладе о солдате» ден «Тылат мурем, Турек кундем» муро-влакым йоҥгалтарыш.
Ты сымыктыш школынак хореографий пӧлкажын «Карусель» ансамбльжым Т.Малышева вуйлата. Военный вургеман ӱдыр-рвезе-влакын «Возвращайся» номерышт путырак ойыртемалте. Тыгак Р.Шаймардановын татарла мурымыж почеш кушталтымышт моторын лекте.
Вет ты районышто марий, татар, руш да удмурт-влак илат, а концерт чыла калыкын мастарлыкыштым ончыктымо дене пойдаралте гына. Тидым мурымаш-куштымаш дене пеҥгыдемдымашым калыкат совым рӱж кырен вашлие. Удмурт-шамычын «Зардон» ансамбльын шке калык куштымашыштым йӧратен ончышна. А марий-влакын чапшым «Арбор вел» ансамбль аралыш, ты кундемыште сар деч варасе сӱан йӱла дене палдарыш.
«Рябинушка» коллектив (вуйлатышыже – А.Якимов) кумылым тарватыше, шонаш да шыргыжаш таратыше руш муро-влакым ынде 49-ше ий йоҥгалтара. Ты ганат «Портяночка» композицийже дене чоным шкеж деке савырыш.
Хлебниково села гыч Н.Фетисова «Баллада о красках» ден Косолап гыч Е.Тюлькина «Ветеранам минувшей войны» мурыла дене концертлан ямым пуртеныт.
Шуко номер сар пагытыш пӧртылтен, тудын кышаж нерген каласкален. Марий Турек гыч тунемше С.Петровын лудмо «28 панфиловцев» почеламутшо 1941 ийысе кредалмаш нерген эше ик гана шарналташ таратен. Уке-уке, ме монден огынал, огына мондо да историйнам, тукымнан вӱрым йоктарен элнам аралымыштым эре шарнаш тӱҥалына.
Мучашлан сценыште «День Победы» мурым С.Устюгов шергылтарыш, а ты концертыш ушнышо 100 утла кугыеҥ ден йоча сарын участникше-влакын портретше дене сценыште да залыште шогеныт. Тидыже зритель-влакын шӱм-чонышкышт патриотизм кумылым утыр ешарыш.
Э.Терентьеван да И.Речкинын фотошт.