Сценыш лекташ чон ӱжеш

Шернур район Кугэҥер ялыште шочын-кушшо, усталык шӱлышан Лариса Еменгулова (Кузьмина) дене эше студет годсек палыме улам. Моло ӱдыр-рвезе-влак деч тудо поснак ойыртемалтын, мураш чот йӧратен. Тачат ты койыш-шоктыш, усталык шӱлышым йомдарен огыл. Шуко вере участвоватла! Кызыт Лариса Еменгулова Шернур посёлкысо А.Ф.Конаков лӱмеш музейно-выставочный комплексыште этнографий пӧлкам вуйлата.

Ача-ава гай чолга

Сценыште шогылташ, мураш-кушташ йӧратыме мастарлык туддек ача-ава деч куснен. Аваже Шернур посёлкысо «Пӧлек» ансамбльыш коштын, ачаже Койсола ялысе «Ӱжара» коллективым чапландарен. Койсола школышто тунеммыж годым Лариса классше дене пырля Лариса школысо, клубысо тӱрлӧ концертыште выступатлен.

«Ме 1-ше класс гычак клубышко коштынна. Койсола клуб вуйлатыше Лидия Васильевна Бердникова мураш туныктен, Валентина Евгеньевна Лучкова кушташ кумылаҥден. Нунылан кӧра мый усталык корнышко шогалынам. Варажым туныктышо, клуб пашаеҥ да тунемше-влак дене пырля хорышто муренам, куштенам, но сценыш шкетын лекташ тоштын омыл», – ойла Лариса.

Мурызо олмеш туныктышо

1-9-ше класслам Койсола, варажым Шернур посёлкысо 1-ше №-ан школлаште тунемын. Творческий, чолга, сценым йӧратыше ӱдыр ончыкыжымат ты корно дене каяш шонен. Но ала-можо тудым МарГУ-со Финно-угроведений институтыш конден.

«Мый тӱвыра да сымыктыш колледжыш пурем, шонышым. Но ачам кӱшыл шинчымаш деч посна илышыште йӧсӧ лиеш мане. Тыге Киров оласе мединститутыш да МарГУ-со Финно-угроведений инстиуттыш йодмашым пуышым. Шкенан вузым ойырен нальым. Тыге вучыдымын марий да йот йылмыла дене туныктышылан тунемаш тӱҥальым», – ойла тудо.

Лариса эре ала-мом ум пален налаш, шуко еҥ дене палыме лияш тыршен. Тудо ик тунемме дене гына мо серлаген? Кушто гына шкем терген огыл! «Марий мурсем» ансабмльыште, мурызо Татьяна Денисован студийыштыже мастарлыкшым нӧлтен, вузысо тӱрлӧ мероприятийыш ушнен, Марий самырык тукым слётышко, Эстонийышке, Тарту университетыште эртыше конференцийыш коштын. Эстонийыште тудо шымлыме пашаж дене финнла докладым ыштен. Университетыште веле Лариса шкетын мураш тӱҥалын.

Тӱрлӧ верыште – паша корно

Л.Еменгулова магистратурышто тунеммыж годым Кужэҥер район Тумньымучаш ялыш марлан лектын. Медведево посёлкысо 2-шо №-ан школышто марий йылмым кугыжаныш йылме семын туныктен. Варажым илыш тудым тӱрлӧ вере кышкен. Шернур посёлкыш ешге илаш куснымеке, ик кевытыште ужалкален, Шернурысо сыр заводын лабораторийыштыже  ыштен, а 2020 ийыште Шернур посёлкысо А.Конаков лӱмеш музейно-выставочный комплексыште информационно-туристский рӱдерым вуйлаташ тӱҥалын.

«Туризм шотышто пеш кугу паша ышталтын. Шуко оҥай верыште лийынам. Ынде кум тылзе этнографий пӧлкам вуйлатем. Утларакше тоштер пашам шуктем.  Йоча-влакым марий йӱлалан, тӱвыралан кумылаҥдем, шочмо йылмым аклаш туныктем. Тоштерыште нунылан экскурсийым, тӱрлӧ  мероприятийым, модышым эртарем. Тыгак марий кочкыш дене сийлена.

Икте тургыжландара: кугу тоштерыште кумытын гына ыштена. Сандене паша шуко логалеш», – мане Лариса Еменгулова.

 Мураш ӱжыт

Ларисам южгунам Шернур тӱвыра да каныме пӧртыштӧ лийше иктаж вашлтиймаш годым мураш ӱжыт. Койсола клубын ансамбльжымат чапландара. А кодшо ийын Йошкар-Олашке Ирина Шабалинан муро студийышкыже кошташ тӱҥалын. Теве икмыняр тылзе ончыч Ларисан «Пӧртылам мӧҥгышкем» икымше мурыжо лекте.

Тудо жапым эре пайдалын эртараш тырша, ешлан, поснак изи эргыжлан жапым шуко ойыра. Тоштерыш куанен вашка, вет ты паша тудлан нимо деч лишыл. Ончыкылык шотышто шонымашыжат шуко.