М.Шкетан лӱмеш национальный драме театрын актёржо, Марий Элын сулло артистше Юрий Алексеев манме дене тудын нерген ойлен пытарымыла ок чуч. Вет кеч-могай йыргешке дате годым юбилярын илышыжым радамлет. Юрий Валерьевичын отпуск жапше дене пайдаланен, кужу жап мутланен кертна. Оҥайын каласкалымыжым эре колыштмет шуэш, вет 70 ий эртыме корныжо кумда да тӱвыра, историй дене кылдалтше событий-влаклан поян. Чыла еҥ тудын семын ыштен ок сеҥе. Вуйлатыме сомылыш шогалмекыжат, артист пашашке кум гана пӧртылын. 60 ийым тошкалмекше, уло кумылын театрыш толын, артистлан пашам ышта. Лач тыгай ошкыл-влак шӱм-чонжо дене тунемме пашажлан ӱшанле улмыжым, тудым чынжымак йӧратымыжым, чын актёр улмыжым пеҥгыдемдат.
Каҥашым пуышо
Юрий Алексеев Марий самырык театрыште, ик жап Курчак театрыште директор лийын. Ты жапыште театр-влакым иктыш ушаш толашеныт, но кок театржат йомын кертеш ыле. Кок тӱрлӧ направлений, тӱвыт вес жанр дене пашам ыштыше театр-влакым умылышо еҥ сапым мучыштараш пуэн огыл. 1993 ийыште Марий Эл Республикын госсекретарьжын, вара Марий Эл правительстве вуйлатышын алмаштышыжын службыжын культур да искусство йодыш дене каҥашъеҥже (советникше) лийын.
Марий культурышто надырым пыштымыжым шкеже тунар кугун ончыко огеш шынде. Ю.Алексеевым тӱрлӧ пашашке тунамсе госсекретарь, писатель Николай Фёдорович Рыбаков кумылаҥден шоген. Туддеч Юрий Валерьевич шукылан тунемын. Кугыжаныш еҥын пашам темлымекыже, кузе отказен кертат?! Тыге «кучем курыкыш» кӱзаш логалын. Тугеже Рыбаков Алексеевын паша ыштен кертмыжым ужын да ӱшанен!
Тунамсе жап нерген Юрий Валерьевич тыгерак каласкалыш:
– Ӱжмылан шке шотем дене моткоч ӧрынам ыле. Пелашем дене мутланымек, Николай Фёдоровичлан кӧнымем нерген ойлаш кайышым. А тылеч ончыч советниклан Семён Николаев ыштен ончен, паша келшен огыл, а туддеч ончыч доктор Ксенофонт Сануковат каен. Советник – кагаз пашам, мо улшо сомылым шуктышо эн изи чиновник. Культур да искусство дене кылдалтше тӱрлӧ проблеме (кинотеатр, клуб, библиотеке але вес учреждений петырныме…) нерген президент лӱмеш толшо серыш, кугу корным эртен, советник деке толын шуэш. Тыланет кагазым возаш нигӧлан пуаш. Тидым тый гына ыштышаш улат. Возышо еҥын кумылжо волышаш огыл, чын ситуацийым пален вашештыман. Тиддеч посна, бригадым поген, ик арнялан республикысе районлаш колтат. Районышто культурын кызытсе состоянийже, ончыкылыкшо нерген отчётым возен пуыман. Тидым ыштен от мошто гын, ты пашаште нимом ышташ. Нигунам кугу начальник лияш шонен омыл.
Службым тунам Виктор Степанович Соловьёв вуйлатен. Кызытат Ю.Алексеев ты пагалыме ен да марла-рушла ойлен-возен моштышо философ дене пашам ыштымыж дене кугешна.
УМБАКЫЖЕ «Кугарня» газетын 2019 ий 23 августышто лекше номерыштыже лудса.
Авторжо — Эльвира Терентьева.