Ӱмаште октябрь мучаште Йошкар-Олаште «Ӱдырсий» конкурс луымшо гана эртаралте. Тушто кундемнан вич районжо гыч ӱдыр-шамыч шке вершӧрысӧ йӱлашт, ыштыш-кучемышт, тӱвырашт дене палдареныт. Кокымшо верым Параньга кундем гыч Яна Глушкова налын. Тудо тыгак «Ушанче» номинацийыште ойыртемалтын.
Мечым чумаш мастар
Ӱдыр Параньга район Штрамарий ялыште шочын-кушкын. Индешымше класс марте Руш Лажмарий школышто шинчымашым поген. Тӱҥалтыш классла гычак школын илышыштыже чолгалыкым ончыктен. Туныктышыжо ӱдырым тӱрлӧ конкурслан, олимпиадылан ямдылен. Лудмаш конкурсышто Яна чӱчкыдын сеҥыше-влак радамыште лийын.
– Школыштына мини-футбол дене секций талын пашам ыштен. Тушко икымше классыште тунеммем годымак ушненам. Ӱдыр-шамычын «Ляжмаринка» футбол командын ик спортсменкыже лийынам. Футбол дене модаш моткоч йӧратенам. Садлан, урок пытымеке, тренировкыш кажне кечын кумылын коштынам. Команде дене пошкудо регионысо тӱрлӧ турнирыш ушненна. Шукыж годым сеҥыше-влак радамыште лийынна, – каласкала Я.Глушкова.
Изинек – сценыште
Ӱдыр тӱвыралан шӱман, уста шӱлышан ешыште кушкын. Аваже Руш Лажмарий тӱвыра пӧртым вуйлата, ачажат ончыч тӱвыра аланыште тыршен, кызыт Йошкар-Олашке пашаш кудалыштеш. Садлан Яна изинек – сценыште.
– Мураш, кушташ моткоч йӧратем. Шочмо кундемыш толмеке, верысе тӱвыра пӧртын сценыштыже эреак выступатлем. Тӱрлӧ номер дене калык ончыко лектам, тыгак мероприятий-влакым вӱдем. Мый ялысе тӱвыра пӧрт пеленысе ансамбльын ик участницыже улам, – палдара ӱдыр.
Идалык ончыч Глушкова Параньга районысо «А ну-ка, ӱдыр-влак!» конкурсышто участвоватлен. Тушто Руш Лажмарий тӱвыра пӧртын чапшым арален. Яна «Элегантность» номинацийыште ойыртемалтын. Ойлымыж почеш, тыгай кӱкшытан конкурсышто икымше гана участвоватлен, чот тургыжланен.
– «Ӱдырсий» конкурсышто Параньга районын чапшым араленам. Мыланем Параньга районысо тӱвыра аланыште тыршыше пашаеҥ-влак полшеныт. Ме «Ӱдыр пурам йӱктымаш» йӱлам ончыктенна. Тудым ожнысо муро, куштымаш-влак дене сӧрастаренна. Конкурслан авам вургемым да моло тӱрлӧ арверым ямдылен. Ты конкурсышто ойыртемалтмаш – кугу коллективын пашаже, садлан нунылан кугу таум каласем, – палемда Глушкова.
Кызыт Яна Йошкар-Оласе Столичный базовый колледжыште нылымше курсышто тунемеш. Правам аралыме дене кылдалтше профессийым налеш – ончыкылык полиций пашаеҥ. Тудын ешыштыжат ты аланыште тыршыше-шамыч улат. Садлан, очыни, ты корным ойыренам, манеш. Яна Глушкова колледжынат илышыштыже чолгалыкым ончыкта. Тӱрлӧ мероприятийышке кумылын ушна. Тыгаяк лийшаш тачысе самырык еҥ: чолга, чулым, шонымашке шуаш тыршыше.
Яна Глушкован альбомжо гыч налме фото.