Сцене деч посна илен ок мошто

Андрей Васильев Марий самырык театрыште 18 ий пашам ышта. Тудын сценыште чоҥымо образше-влак моткоч шкешотан улыт, шарналт кодыт. Уста актёр кеч-могай рольым модеш гынат, ончышо еҥын кумылжым савырен мошта. Тидын шотышто мут лекмеке, Андрей Анатольевич тыгерак мане:

– Йӧраш тӧчен модат гын, ончышо-влак койышланыметым вигак шижыт. Актёр калыклан келшаш кӱлмӧ нерген шонышаш огыл. Рольышто илыман, геройын кӧргӧ кумылжым шижман, тудым умылыман. Кеч мыскара образ лийже, кеч драматический, кеч кугыеҥ ончылно модат, кеч йоча-влаклан. Зрительым от ондале.

18 ий жапыште Андрей Васильев ятыр рольым чоҥен. Палыме шуэш: нунын кокла гыч актёрлан могай роль эн лишыл, келшыше?

– Кеч-могай ролым йӧратен чоҥем, – мане Андрей. – Но мыскара образ нерген ойлымо шуэш. Мылам воштылаш таратыше геройын чон кумылжым шымлаш келша. Тыгай образ шукыж годым илыш гычак налалтеш, садлан тудым модашыжат оҥай. Шарнем, театрыш толмекем, вигак Геннадий Гордеевын «Ял ӱмбалне мужыр йӱксӧ» спектакльыштыже гармоньчо Шуматын рольжо логале. Тиде спектакль ятыр ий шындалте, а Шуматын образше мылам эрелан лишыл лийын кодо. Таче кече нерген ойлаш гын, чыла спектакльна моткоч сай улыт. Но марий произведений-влак чонлан лишылрак чучыт. «Немыч вате» спектакльыште Гентос улам, а «Торешватесолаште томаша»-ште – Тимка. Ты герой-влакын образышт адакат илыш гыч налме улыт. Нуным ужын, южо еҥ шке койышыжым шекланен кертеш.

Идалык ончыч Андрей Васильев Марий кугыжаныш университетыште режиссёр специальность дене кӱшыл шинчымашым нале. Ынде тудо спектакльым шкеат шынден кертеш. Тидым ышташ илыш да паша опытат ситыше. Актёр да режиссёр дене тидын шотыштат мутланышна.

– Спектакльым шындаш кумыл уло. Тидлан жап гына лийже. Шкемын веле огыл, театрысе моло актёрынат. Молан манаш гын тӱҥ паша деч кодшо жапым кажныже муын огеш керт. Спектакльым ямдылаш гын, тудым театрын сценыштыже модман. Йоча-влаклан марла спектакльым утларак ончыктымо шуэш. Но чаманен каласыман, изирак ийготан марий зрительна-влак шагалемыт. Йоча спектакльым нуно огыл гын, кӧ онча? Тидын верч чон вургыжеш, – каласыш Андрей Анатольевич.

Йоча-влак нерген мут лекмеке Андрей шкежат йоча пагытшым, Морко районысо шочмо Чавайнур ялжым, Изи Корамас ден Арын школлаште тунемме жапшым шарналтыш. Колхоз пашаште тыршыше рвезе актёр лияш шоненат огыл, но ик кечын Чавайнурыш марий спектакльым ончыкташ конденыт улмаш. Спектакль деч вара «Актёр лияш кумылда уло гын, тунемаш толза» манме ой рвезылан иктешлыше лийын. Вашке Андрей Йошкар-Олашке толын, кузежым-можым пален налмеке, экзаменым кучен да тӱвыра да сымыктыш колледжыш тунемаш пурен.

– Тунем пытарымеке, вигак Марий самырык театрыш налыныт. Тӱҥалтыш жапыште пеш неле ыле. Пашадар тунам – 500 теҥге, 200 теҥгелан койко-верым айленам… Йӧра эше тунам ача-авам иленыт, кочкаш ял гыч пуэн колтеныт. Чыла эртен. Мо улыжлан тауштем. Паша чонетлан келша гын, южгунам чыташат логалеш шол. А ынде, тынар ий эртымеке, театр мыланем – пӱтынь илышем. Мый сцене деч посна иленжат ом мошто.