ойла Елена Березина.
Пытартыш жапыштре пиар (PR)-специалист манме профессий нерген чÿчкыдынрак колаш логалеш. Кызыт илыш йогынжат тыгай: шкем шке темлен, ончыктен от мошто гын, у сеҥымашке шуаш неле. Тиде профессий кугу компанийлаште поснак кÿлешан. Вет пиар-специалист организацийын пашажым калыклан палдара, тÿрлö вашлиймаш-влакым эртара, проект-влакым ямдыла да тулеч моло.
Елена Березина – Шернур сырзаводын продукцийже да «Лукоз» каза фермын пашаж дене палдарыше пиар-специалист. Ӱдырын ойлымыж почеш, кок ий утла тыште тыршыме жапыште ты паша вер тудлан кокымшо мöҥгыжö лийын шуктен.
– «Пиарщикын» раш паша графикше уке. Ме кеч-могай жапыште да верыште пашам ышташямде лийшаш улына. Ончыч тидыже изиш öрыктара ыле, а кызыт мылам тыгай илыш радам моткоч келша. Мый тÿрлö мероприятийлаште лиям, еҥ-влаклан сырым ямдылыше компанийна нерген каласкалем, видеосъёмкым, фотосессийым эртарем. «Лукозын» продукцийжым шуко вере палат, йöратат. Тидыже поснак куандара, эшеат у кÿкшытыш шуаш кумылаҥден шога. Сай сатум ямдылыше шотан компанийыште тыршымем дене кугешнен кертам, – каласкала Елена.
Тыгай пашам творческий шÿлышан еҥ веле шуктен кертеш. Лена ты шотышто öрын да лÿдын ок шого. Марий кугыжаныш университетыште журналистлан тунеммыж годымак ятыр мероприятийыште шке вийжым терген. Киевыш да Анапыш коштшо поездлаште каникул жапыште проводницылан тыршен, еҥ-влак дене пашам ышташ тунемын. Ӱдыр тыгак Марий Эл ГТРК телерадиокомпанийысе «Радио России» студийыште практикант лийын, телевиденийыштат мастарлыкшым нöлтен. «Маяк» радиостанций почылтмеке, Лена тушто продюсерлан ыштен. Тунамсе жапым шарналтен, ÿдыр тыгерак каласыш:
– Илышыштем эре поро еҥ-влак вашлиялтыт, полшат. Телерадиожурналист пашаште мый шукылан тунемынам. Мутлан, еҥ-влак дене мутланен мошташ. Вет нунын дене икойыш шуын от мошто гын, нимогай пашат шотлан ок тол. Тыште тÿням фото да видео гоч ужаш, ончыктен мошташ туныктеныт. Кызыт мылам тидыже моткоч полша.
Икманаш, «Могай паша ешыш логалат, шкежат тугай лият» манмылан ÿшанем. Кызытат сырзаводысо маркетинг пöлкаште тыршыше-влак дене пырля улмемлан моткоч куанем. Ме ик шÿлыш дене, ваш умылен пашам ыштена, ятыр сай шонымашым илышыш пуртена.
Ленан рушлат, марлат сылнын мутланен колта. Еҥ-влак дене пашам ыштыше еҥ лач тыгай лийшаш. Кушто, могай ешыште шочын-кушкын тыгай уста марий ÿдыр? Лена шкеж нерген тыгерак каласкалыш:
– Мый Шернур район Марисола гыч улам. Школым тыштак тунем лектынам, вара МарГУ-што шинчымашым погенам. Авам – медицине пашаеҥ, ачам колхозышто тыршен. Нуно ынде коктынат 70 ийыш вонченыт. Мыняр палем, ачам ден авам эре илышым йöратыше, чын верч шогышо, поро кумылан, пашаче да уло калыклан сай лийже манын тыршыше улыт. Нуным ончен, мыят тыгай койыш-шоктышан лийынам. Пашаштем тиде моткоч полша. Вет илышыште чын, весым пагалыше отыл гын, нимогай лектышат ок кой. Садлан ача-авамлан моткоч тауштем.
Творчествын мучашыже уке, маныт. Усталык шÿлышан айдемат ик тÿрлö сомыл дене веле ок серлаге. Елена Березина яра жапыштыже сÿретлаш йöрата. Чия дене, я карандаш дене. Вет изиж годым ÿдыр ик жап сÿретче лияш шонен улмаш. Но шке манмыжла, тÿнян чияжым ужын моштымаш нигушкат ок йом. Тудо илышыште моткоч кÿлешан. Лена тыгак вургемым урга. Чыла гаяк кеҥежымсе чиемжым шке урген.
– Сÿретлыме годым мый йыр улшо тÿням жаплан мондем, шке сандалыкыштем илем. Тиде канаш полша. А ургаш студент пагытыштак тÿҥалынам. Тунам вургем пешыже лийын огыл, а мыйын моторын чийыме шуын. Шарнем, икымше тувырым рвезе дене икымше гана вашлияш кайымем деч ончыч ургенам. Чонемлан келшен, вара эре ургымо шуын.
Такшым мый чыла шотыштат моторлыкым йöратем. Чийымаште веле огыл, кеч-куштат. Йылме моторлыкым, мутлан. Келша, кунам айдеме чаткан мутланен колта. Эсогыл радиом, сылнын ойлат гын веле, колыштам. Йöратем моторын койшо сатум. Рекламат шинчалан келшыше, чоным сымыстарыше лийшаш, – ойла Елена.
Пиар-специалистлан пашам ыштымаште творческий шÿлыш веле огыл, чулымлыкат кÿлеш. Е.Березина ты шотышто лудшына-влаклан шке шонымашыжым почо, паша лектышын «секретше»-влакым каласыш:
– Таче кечын лÿддымö, чолга лийман. Уым, сайым пален налаш öрман огыл, вет илыш моткоч вашке вашталтеш, тудын почеш вашталташ тунемман. Уке гын «савар шеҥгеланак» киен кодат. Тöчен ончыде, «Кертам ала уке?» манме йодышлан нигунам вашмутым от му. Ыштет – шке виетым тергет, пален налат, тунемат. Илышыште ошым да шемым кычалме ок кÿл. Палыман: илыш моткоч сылне да тÿрлö тÿсан.
А.Яковлева.
Фотом ӱдырын альбомжо гыч налме.