ФСИН-ын Марий Элысе управленийжым вуйлатыше межведомственный паша группын заседанийыштыже лийын. Тушто регионысо уголовно-исполнительный системыште производствым вияҥдыме нерген ойленыт.
Ведомствым вуйлатышын алмаштышыже Н.Шабалинын палдарымыж почеш, ик эн тӱҥ йодышлан производственный секторым кугемдымым да кучем орган-влак дене кылым пеҥгыдемдымым шотлыман.
Тений пелийыште, мутлан, 4,3 млн наре теҥгелан 15 контрактым ыштыме, тылеч вара – 4,5 млн теҥгелан эше 6 контрактым. Заказчик-влак коклаште – тазалыкаралтыш учреждений-влак, муниципал районласе администраций-шамыч, техникум-влак да Йошкар-Оласе Рӱдӧ парк. Исправительный учрежденийлаште кӱртньӧ да сад ден парклан келыштарыме мебельым, печым, павильоным, светильникым, куштылго промышленность сатум, консервироватлыме да сувенир сатум ямдылат.
Марий Элысе УФСИН-ын пресс-службыжын фотожо.