Волжский районышто илыше 36 ияш пӧръеҥ интернетысе ик сайтыште снегоходым ужалыме нерген уверым ужын да «ужалышылан» возен колтен. Кутырен келшымеке, сатулан оксам ончылгоч колтен, но снегоходым вучен шуктен огыл. Эҥгек 500 тӱжем наре теҥгеш шуын, палдара Марий Элысе МВД.
Медведево районышто илыше 66 ияш пӧръеҥ тыгаяк схеме почеш ондалалтын да 45 тӱжем теҥге деч посна кодын. Тудо автомашиналан двигательым налаш шонен. Тудлан сатум «ужалыше» еҥ ссылкым колтен, пӧръеҥ ссылке почеш пурен, банкысе картыжын данныйжым возен. Тылеч вара картыж гыч оксаже йомын.
Фото: freepik сайт гыч.