Шернур район Марисола кундемын шочшыжо А.И.Григорьев – мастар сӱретче да уста туныктышо.
Тидыжым тӱрлӧ конкурсышто сеҥышыш лекмыж гычат пален налаш лиеш. 2009, 2010, 2019 ийлаште Шернур районышто эртарыме «Идалыкын туныктышыжо» конкурслаште лауреат лийын. Тылеч ондакырак самырык педагог-влак коклаште тыгаяк таҥасымаште ойыртемалтын. А кодшо ийын педагог-влакын «Виват, таланты!» Российысе усталык конкурс-фестивальыштын лауреатше лӱмжым сулен.
Тунемшыже-влак Карина Гусева, Ксения Мочаева да Илья Григорьев тӱрлӧ ийыште регион-влак кокласе да Российысе конкурслаште призовой верлашке лектыныт.
Сӱретчын пашаже-шамычым Дина Рычкован, Елизавета Марченкован, Николай Свистуновын, Анастасия Глазыринан да моло авторынат книгаштышт ужаш лиеш.
Марисола школышто марий йылмым да литературым туныктышо Д.М.Рычкова шке жапыштыже Марисола вел сӱретче-влакын картиныштым ик верыш чумырен. Нунын коклаште А.И.Григорьевын пашаже-влак улыт. Тыгак художник-педагогын школ пырдыжлаште, моло вереат сылне сӱретым келыштарымыже да чиям мастарын кучылт моштымыжо коеш.
Алексей Иванович шке пашажым республикысе выставкылашкат ятыр гана чумырен. 2006 ийыште тудлан «Живопись» номинацийыште районышто Ф.Шабердин лӱмеш премийым пуэныт. Персональный ончерже Шернурысо да Йошкар-Оласе тоштерлаште, С.Г.Чавайн лӱмеш Национальный книгагудышто, Чебоксарысе И.Я.Яковлев лӱмеш кугыжаныш педуниверситетыште да моло вереат ончыкталтын.
УМБАКЫЖЕ «Кугарня» газетыште лудаш темлена (2023 ий 16 июнь, №24)
