Марий Элыште «Дети войны» удостоверенийым кӧлан да кушто пуат?
Тиде йодышлан вашмутым Марий Эл Республикын Калыкым социально аралыме да паша министерствыште рашемдышна. Сарын йочаже-влак шотышто республикыште могай паша ышталтме нерген вашмутым Марий Эл Республикын калыкым социально аралыме да паша министрын алмаштышыже Э.И.Загрутдинов пуыш:
– Марий Эл Республикын 2022 ий 27 декабрьыште лекше 54-3 №-ан «О детях войны в Республике Марий Эл» Законжо дене келшышын, 1927 ий 1 январь гыч 1945 ий 31 декабрь марте СССР-ыште шочшо да Марий Эл Республикыште эре илыше россиянин-влаклан «Сарын йочаже» статус пуалтеш.
Сарын йочаже-влаклан тыгай социальный полыш пуалтеш:
– кажне ийын Сеҥымаш кечылан окса выплате, тидым Марий Эл Республикым Вуйлатыше указше дене палемда;
– здравоохраненийын кугыжаныш але муниципальный системысе медорганизацийыштыже Марий Эл Республикын медицине полышым яра пуымо кугыжаныш гарантийыш пурышо медицине полышым черет деч посна пуат;
– стационарыште, социально обслуживатлыше рӱдерлаште социальный услугым да социальный полышым пуышо пӧлкан пашаеҥже-влак мӧҥгыштӧ обслуживатлыме услугым налаш черет деч посна правашт уло.
Сарын йочаже-влак, кӧмыт тыгак Сеҥымаш кечылан кажне ийын окса выплатым Россий Федерацийын 2019 ий 24 апрельыште лекше 186-шо №-ан «О ежегодной денежной выплате некоторым категориям граждан к Дню Победы» Указше почеш налаш правашт уло, кудо амалже почеш налаш, шке ойырен кертыт. Сарын йочаже-влаклан социальный полыш удостоверений улмо годым пуалтеш.
«Дети войны» удостоверенийым налме шот-радамым Марий Эл Республикысе Правительстве 2023 ий 10 мартыште 97-ше №-ан пунчалже дене пеҥгыдемден; тудым Марий Эл Республикын кугыжаныш казённый тӧнежше-влак – калыклан социальный полышым пуышо оласе (районласе) рӱдер-влак – пуат.
Удостоверенийым налаш манын, саде категориян еҥ але тудын представительже Калыклан социальный полышым пуышо илыме верысе рӱдерыш але кугыжаныш да муниципальный услугым пуышо шуко функциян рӱдерыш иканаште теве тыгай документ-влакым пуышаш:
– гражданин улмым пеҥгыдемдыше документ;
– Марий Эл Республикыште илымым пеҥгыдемдыше документ (паспортышто тидым ончыктымо огыл гын).
Документ-влакын копийыштым оригинал дене пырля намийыман.
Удостоверенийым налаш манын, йодмашым возышын представительже кая гын, ты еҥын гражданин улмыжым ончыктышо да заявительын полномочийжым пеҥгыдемден кертме шотышто документше-влак кӱлыт.
Тыгак йодмашым да документ-влакын копийыштым калыклан социальный полышым пуышо рӱдерлашке электрон почто дене колташ лиеш. Тыгодым документ-влакым Россий Федерацийын пеҥгыдемдыме законодательствыж почеш заверитлыман.
Эльвира Терентьева.