Сар нерген палет мо?

5 майыште Юл кундем федеральный округышто Кугу Отечественный сарлан пӧлеклалтше «IQ-ПФО»:Великая Победа» «Что? Где? Когда?» модмаш дистанционно эртен. Тушко 7-ше-11-ше класслаште тунемше, студент, туныктышо-влак ушненыт.

Тудо кумшо гана эртаралтын. 2020 ийыште Юл кундем федеральный округын чыла регионжо гыч 151 команде таҥасен (900 утла участник) гын, 2021 ийыште – 415 команде.

Участник-влак https://intgame.ru/iqpfo сайтыште регистрацийым эртеныт, ты платформышто таҥасеныт. Модмашын кок турышкыжо Кугу Отечественный сарын историйже дене кылдалтше 24 йодышым пуртымо. Участник-влак кучедалмаш, полководец-влакын илыш корнышт, подвиг, награде, сар годсо фильм да муро-влак нерген шинчымашыштым ончыктеныт.

А Йошкар-Оласе 11-ше №-ан лицейын «ИнИгМА» командыже Юл кундем федеральный округышто тунемше-влак коклаште эртаралтше «Что? Где? Когда?» интеллектуальный олимпиадын финалыштыже ойыртемалтын. Тудо Саратов, Пенза областьласе команде-влакым ончылтен, 3-шо верым налын.