15-18 июньышто Санкт-Петербургышто тӱнямбал экономический форум эртаралтеш. Тушко Марий Эл Республикым вуйлатышын пашажым жаплан шуктышо Юрий Зайцев каен.
Газым – 50 ялыш
Тыгай форум 1997 ий годсек эртаралтеш. Нине кечылаште Юрий Зайцев Российысе чоҥымо паша да ЖКХ министр Ирек Файзуллин, Федеральный антимонопольный службын вуйлатышыже Максим Шаскольский, «Газпром газификаций» ООО-н генеральный директоржо Сергей Густов дене вашлийшаш, кӱлешан икмыняр ойпидышым ыштат.
Юрий Зайцевын палемдымыж почеш, тыгай форумышко ушнен, регионышко газификаций, промышленность, у инвестицийым кондымо шотышто йодыш-влакым каҥашаш лиеш. Тачысе кечылан тӱҥ задаче – Марий Элыште газ пучым шупшман. Вичияш план почеш, 50 утла ялышке газым пурташ манын, посёлко-влак коклаште газпучым шупшшаш улыт. Форумышто тыгак южо районышко газ пурталтде кодымо шотышто йодышым каҥашат.
Юрий Зайцев Чуваший Республик дене пырля пашам ышташ ойпидышым ыштен.
Марий-влак дене вашлийын
Ю.Зайцев Питерысе Келшымаш пӧртыштӧ марий землячестве да «Ший корно» Марий национально-культурный автономийын еҥже-влак дене вашлийын мутланен.
Вес ийын «Ший корно» организаций 10 ияш лӱмгечыжым палемда. Ю.Зайцев ты олаште Марий Элысе представительствым почаш кӱлмӧ дене келшен. Варажым тудо организацийын тоштерже дене палыме лийын. Вашлиймашке погынышо-влак музыкальный раритетный звукозапись-влакым цифроватлыме, этномузыкологий, театр, балет, социокультурный паша шотышто специалист-влакым ямдылыме шотышто каҥашеныт.