Козьмодемьянск оласе индустрий да предпринимательстве колледжын студентше-влак Владимир Прыгунов ден Антон Яковкин Российысе кибергигиене фестивальын 40-топ финалист радамышкыже пуреныт. Ты верлан 2000 еҥ таҥасен.
Кок арняште рвезе-влак Козьмодемьянск оласе «IT-Куб» рӱдерым вуйлатыше А.Ю.Королева дене пырля цифровой гигиене да big data специалист-влакын занятийыштышт тунемыныт. Тидлан кӧра рвезе-влак фестивальын отборочный турыштыжо заданийым сайын ыштеныт, полуфиналыш лектыныт. Тушто нуно посна проектым ямдыленыт да «НЕ CLICKай беду» социальный рекламе конкурсышто участвоватленыт. Ынде рвезе-влак 26-29 октябрьыште Санкт-Петербургышто фестивальын очный финалыштыже таҥасаш тӱҥалыт.
Козьмодемьянскысе «IT-Куб» рӱдерын тунемшыже В.Никитина «Графический дизайн» программе почеш ты фестивальыште да социальный рекламе конкурсышто «Плакат» номинацийыште сеҥышыш лектын.