Марий Элысе федеральный льготник-влак санаторийлаште яра канен кертыт. Тений идалык тӱҥалтыш гыч 407 еҥлан путёвкым пуымо.
Йодмашым возымке, путёвкым черет почеш пуат. Санаторийлаште кугыеҥ-влак 18 кече канат да эмлалтыт, инвалид йоча – 21 кече, а туп да вуйдорык дене кылдалтше черан инвалид-шамыч – 24 кече гыч 42 кече марте.
Тазалыкым республикысе да туддеч ӧрдыжсӧ санаторийлаштат саемдаш лиеш. Кугыжаныш услугым налаш манын, Россий Социальный фондын клиент-влак службышкыжо але МФЦ-ш миен, йодмашым возыман. Тидым Госуслуго портал гочат ышташ йӧн уло. Тушко 070/у форман медицине справкым намийыман. Черетым СФР-ын сайтыштыже ончалаш лиеш.