Самырык-влакын кечышт вашеш Россий мучко тӱрлӧ фестиваль эрта. Организатор-влак сай программым сӧрат: концерт, мастер-класс, лекций, вакансий ярминга да стажировко бирже-влак.
Самырык—влакын пашашт шотышто федерал агентствын вуйлатышыже Ксения Разуваеван ойлымыж почеш, «Самырык-влакын кечышт — 2022» фестивальыште жапым эн пайдалын эртараш лиеш: волонтёр пашам шукташ, партнёр компаний-влак деч стажировко нерген пален налаш, шке усталыкым почын пуаш.
Фестиваль индеш ужашан лиеш: усталык, тазалык илыш-кучыш, порылык, мыскара, музык, шинчымаш, паша (карьера), келшымаш да йӧн-влак.
Фестиваль 10 регионышто эрта: Москошто, Озаҥыште, Угарманыште, Калининградыште, Мурманскыште, Екатеринбургышто, Владивостокышто, Махачкалаште, Красноярскыште да Крымысе Тарханкут мысыште.
Участник лияш деньмолодёжи2022.рф сайтыште регистрацийым эртыман да оксам тӱлыде пураш электрон билетым налман.
Эн оҥай мероприятий-влакым тыште (https://vk.com/rosmolodez) онлайн ончаш лиеш.
Фестивальын унаже-влак – Клава Кока, Ваня Дмитриенко, Niletto, L’One, Мари Краймбрери, Bahh Tee, МОТ.
Татарстаныште фестиваль «Урам» самырык-влакын экстрим-паркыштыже эрта. Тушто квадроцикл да спортбайк дене кудалыштмашым, скейтборд дене трюк-влакым, ӱстел теннис таҥасымашым, куштымаш баттлым, поэзий слемым, стенд-ап комик-влакын выступленийыштым, стрит-арт да «Уличная классика» фестиваль-влакым ончаш лиеш. Озаҥысе фестиваль площадкын эн тӱҥ унаже — мурызо Niletto.
Самырык улмыдам 26 июньышто Российысе лу олаште фестивальыште палемдыза!