12 ноябрьыште РФ-се Юл кундемысе федеральный округын полономочный представительжын Советшын заседанийже эртаралтын.
Тушто ПФО-со кундемлаште молодёжный политике йодыш-влакым ончен лекме. Игорь Комаров Советын еҥже-влаклан самырык еҥ-влакым туныктымо да воспитатлыме сомыл, тыгак паша верым мумо нерген каҥашаш темлен. Тидыже кызытсе жапыште ты сферыште могай механизмын пайдале улмыжым рашемдаш полша. Молодёжный политикым илышыш шыҥдарымаште регион вуйлатыше-влакын тӱткышыштым материально-технический базым уэмдымылан, информационный паша системым ворандарымылан да самырык-влакым тӱрлӧ сай сомылым ышташ кумылаҥдымылан виктараш кӱштен.
РФ Президент фондын мер проектше-влак шотышто вуйлатышыже С.Новиков округышто кугыжаныш политике сферыште шукталтше проект-влак нерген ойлен, тыгодым ПФО волонтёр корпусышто чолгалыкшым ончыкта манын. Кызыт #МыВместе акцийыште 2,5 тӱжем утла доброволец участвоватла. Округышто коммерческий огыл секторлан полшымо шот дене Президент грант-влакын фондышт 66 проектлан 93 млн теҥгем ойырен.
Марий Элыште 14-35 ияш 184 тӱжем утла еҥ ила. Республикна кугыжаныш молодёжный политикым шуктымо шотышто РФ-н 85 субъектше гыч 28-ше верым айла, ПФО-што – кудымшым. Марий кундемыште юнармеец ден доброволец-влакын пашаштым, амалкалче семын тыршымым, паша верым ситарымым, таза илыш-йӱла да спорт дене таҥлалтмым ойырен каласыме. Ты шотышто Самырык-влаклан полат ден «Авангард» рӱдер ойыртемалтыт, кугыжаныш программым шукташ да молодёжь дене тӱрлӧ направлений дене пашам ышташ республикысе бюджет окса дене полша. Начар тазалыкан, поснак аутизм черан, йоча-влак дене паша ышталтеш.
Марий Элыште доброволец-влакын толкынышт 2017 ий годсек вияҥеш. Ты жапыште доброволец-влакын чотышт кок пачаш ешаралтын, кызыт ты пашам 76 тӱжем утла еҥ шукта. 2018 ийыште Добровольчествылан полшышо ресурсный рӱдерым почмо, а кодшо ийын тушто #МыВместе штабым чумырымо. Штабыш 500 утла доброволец ушнен. Тыште 1500 тӱжем йодмашым ончен лекме, еҥ-влаклан 20 тӱжем кочкыш наборым намиен пуымо.
СНИМКЫШТЕ: 1) заседаний годым.
2) 12 ноябрьыште #МыВместе штабын волонтёржо-влак #ТележкаДобра акцийыш ушненыт — илалше-влаклан 25 кочкыш наборым пуэденыт.