Марий Эл Правительстве 2030 ий марте чыла округ ден районышто молодёжный рӱдер-влакым ышташ шона.
Марий Элысе кугыжаныш молодёжный политикым да тудын ончыкылык задачыже-влакым Марий Элым Вуйлатыше пеленысе Советын заседанийыштыже каҥашеныт.
Республикыштына Самырык-влаклан полатыште шуко функциян рӱдерыште молодёжный программе ден проект, патриотизм шӱлышеш шуарыме, медиа ден коммуникаций, организационно-творчески вияҥме подразделений-шамыч пашам ыштат. Тыгак Марий Элыште Добровольчествылан полшышо ресурсный рӱдер уло.
Тыште идалык мучко 500 утла мероприятий ден акций эртаралтыт. Тушко 120 тӱжем утла самырык еҥ ушна. Республикын «Регион для молодых» конкурсышто сеҥымыже федеральный ден республикысе бюджетла кӱшеш Самырык-влак полатым капитально олмыктымо, у площадке-влакым келыштарыме.
Марий Элым Вуйлатышын пунчалже почеш молодёжьым сарзе да патриотизм шӱлышеш воспитатлыме «Авангард» рӱдерыште инфраструктурым уэмдыме, кызыт тудым олмыктат. Тыште активист ден доброволец-влакым, молодёжь дене ыштыше специалист-шамычым туныктат, таза илыш-йӱла шотышто семинар-влакым эртарат, неле илыш ситуацийыште улшо йоча-шамычлан профильный смене-влак лийыт. Кажне ийын «Авангардыште» 60 наре мероприятий лиеш, тушко 7 тӱжем наре еҥ ушна.
Пытартыш кум ийыште самырык-влаклан тӱрлӧ верым уэмдыме, тидлан чылаже 330 млн наре теҥге ойыралтын. Российысе рейтинг почеш Марий Элыште кугыжаныш молодёжный политикым шуктымаш 200 тӱжем наре еҥан самырык еҥ улмо тӱшкаште 2-шо верым айла.
Тыгак юнармеец-влакын толкыныш ушнымышт дене кундемна ПФО-што 5-ше верыште, а элыште 20 эн сай субъект радамышке логалын.
Республикысе молодёжный политике комитетын председательже Станислав Игошин район ден регионлаште самырыклан шке шонымашке шуаш полшышо вер лийме, тидлан рӱдер-влакым ыштыме нерген ойлен.
Заседанийышке видеоконференций йӧн дене статс-секретарь – Молодёжь паша шотышто федеральный агентстве вуйлатышын алмаштышыже Денис Аширов ушнен да каласен:
– Республикыште поро кумыл дене пашам шуктышо волонтёр-влак шукемыныт: 45 тӱжем гыч 95 тӱжем марте. Ме ужына, кузе волонтёр-шамыч СВО участник-влаклан, ЧС зонышто да Шем теҥыз воктене, Краснодар крайыште полшат.
Тыгак Д.Аширов «Молодёжь и дети» нацпроект почеш Марий Элым Вуйлатыше пелен Молодёжный политике шотышто Советым кӱлешанлан шотлен.