16 июньышто Марий Эл Республикысе Калык фронтын Молодёжкыжо Ростов-на-Дону ола гыч пӧртылын. Самырык-влак тушко нылымше гана миен толыныт, кок арня лийыныт.
Тидын нерген ты командын координаторжо Анна Вылегжанинам каласкалаш йодна:
– Икымше гана ме тыгай миссий дене 2023 ийыште май-июньышто миенна ыле. Тунам Ростов-на-Дону ден Мариуполь олалаште лийынна. Тылеч вара Курскыш кок гана миен толынна: 2024 ий шыжым да 2025 ий тӱҥалтыште.
Ты гана 18-25 ияш 15 еҥ миенна. Ныл кече Ростов-на-Дону олаште пашам ыштенна, а молыжым – Донецк Калык Республикын тӱрлӧ районыштыжо.
Мемнан коклаште тӱҥ шотышто ончыкылык утарыше ден медпашаеҥ-влак лийыныт. Нуно Кугыжаныш да муниципальный службо колледжыште, Столичный бизнес ден Медицине колледжлаште тунемыт.
Ме Ростов-на-Дону олаште тӱрлӧ складыште гуманитарный кочкыш сатум шотлен фасоватленна. Тыгак вургемым беженец ден у регионлаште илыше-влаклан оптенна. Боец-влаклан адресный полышым ямдылкаленна.
Вашке Донецкыште салтак-шамычлан у реабилитаций рӱдер почылтеш. Ме тудым шотыш кондаш полшенна. Тыгак мемнан студент-шамыч Угледар ола деч тораштак огыл верланыше Никольский монастырьыште тыршеныт. Виян да мотор верыште кредалмаш каен. Ме шалатен кодымо верлам эрыкташ полшенна. Эн чотшо тыште пашам ышташ келшыш: храмжат пеш мотор, монах, монахине да бачышка деч поро шомакым гына колынна. Кушто пашам ыштенна, чыла вере тауштеныт.
Ме Коми Республик гыч толшо самырык-влак дене пырля 32 еҥ тӱрлӧ пашам шуктенна. Келшен иленна да ик кугу команде лийынна. Сандене тушеч кайыме да ойырлымо годым шортыннат.
Тылеч посна тӱвыра программат лийын. Мыланна Мариуполь оласе «Азовсталь» металлургический комбинатыште экскурсийым эртареныт. Теҥызыште йӱштылынна, ала-кӧжӧ – икымше гана. Донецкысе военно-мемориальный комплексыште экскурсовод шуко оҥайым каласкален, ДНР-ын икымше вуйлатышыже Александр Захарченкон колымо верышкыже миенна.
Шижалтын: ӱдыр-рвезе-влак эллан да мемнам аралыше эрге-шамычлан чынжымак полшаш ямде улыт.
Эльвира Терентьева.
Фото-влакым А.Вылегжанинан архивше гыч налме.