1 февральыште Морко районысо туныктымо пӧлкаште марий йылме, литератур, марий кугыжаныш йылме, ИКН предметлам туныктышо-влаклан районысо методушем погын эртаралтын. Тудо «Йоча-влакым духовно-нравственно шуарымаш урокышто да урок деч ӧрдыжтӧ» темым авалтен.
Протоиерей Николай Чузаев «Марий йылмым туныктымаште духовно-нравственный воспитанийын верже» темым моткоч кумдан почын пуэн.
Морко районысо методрӱдерым вуйлатыше Светлана Леонидовна Александрова марий сылнымутым йӧратыше йоча-влаклан «Сылнымут шошо» литературный семинарым эртарыме нерген ойлен.
Марий йылме да литератур предметла дене 2023-2024 тунемме ийлаште экзаменым кучымо нерген Унчо школын марий йылме ден литературым туныктышыжо Людмила Константиновна Игнатьева каласкален. Ты ий гыч шочмо йылме да литератур дене экзаменым кучымаш у сыным налын. А Унчо школын тунемшыже-влак тидын шотышто апробацийым эртареныт, шке вий-куатыштым тергеныт да сай лектышыш шуыныт.
Ий гыч ийыш этнокультур предметла денат районысо, регионысо олимпиаде-влак эртаралтыт. Ты шотышто иктешлымашым С.Л.Александрова ыштыш. Тыгвк 2023-2024 тунемме ийлаште «Эн сай марий йылме туныктышо» районысо профессионал таҥасымашке ушнаш кумылаҥдыш. Вара «Мунло» интеллектуал таҥасымаште сеҥышыш лекше Морко районын «Чолпан» командыжлан чап кагазым кучыктыш.
Елена Григорьева, Морко районысо марий йылме туныктышо-влакын методушем вуйлатышышт.
Снимкыште: «Мунло» интеллектуал таҥасымаште сеҥышыш лекше Морко районын «Чолпан» командыже.