Марий Элысе МВД-ште ведомство-влак коклаште эртаралтше «Дети России – 2022» комплексный оперативно-профилактический операцийын икымше этапшым иктешленыт.
Тушко полицейский-влак гына огыл, тыгак тазалыкым аралыме, туныктымо, самырык-влак дене паша шотышто учреждений-влакын еҥышт ушненыт. Нуно ийготыш шудымо ӱдыр-рвезе-влак коклаште наркотикым кучылтмым чарыме, наркотикым закондымын шаркалыме осал пашаш ушнымо да тидлан закон почеш мутым кучымо, тыгак наркотикын тазалыклан эҥгекым кондымыж нерген палдареныт.
Марий Элысе туныктымо тӧнежлаште тунемше да ача-ава-влаклан, тыгак туныктышо-шамычлан МВД пашаеҥ ден тазалыкым аралыме министерствын еҥышт профилактике сынан 1810 мероприятийым эртареныт.
Операцийын икымше этапыштыже 1086 объектым тергыме: самырык-влак тӱшкан погынымо верлам, каныме, ужалыме да транспорт объектлам. Полиций пашаеҥ-влак административный правам пудыртымо шотышто 128 протоколым возеныт, тушечын иктыже – ийготыш шудымо йоча шотышто. 18-35 ияш 3 еҥын наркотикым закондымын шаркалыме 6 преступлений нерген пален налме. 176 г наркотический средствам да психотропный веществам поген налме.