Кажне ийын теле тылзын 10-шо кечынже Марий тиште кечым палемдена. А Морко велыште тидлан поснак кугу тӱткыш ойыралтеш. Этнокультур предметлам туныктышо-влак ты сомылым чот вияҥдаш тыршат. Теве теле тылзын 8-ше кечынже районнан кажне школжо «Марла чын возена» диктантым тӱшкан серыме акцийыш ушнен.
Шӱргыял школыштат «Марий сылнымут садвечыште» кружокын чолга тунемшыже-влак ик марий пайремымат ӧрдыжеш огыт кодо. «Марла чын возена» акцийыш 8-9-ше класслаште шинчымашым погышо ӱдыр-рвезе-влак икте кодде ушненыт. Школысо 11 тунемше кокла гыч Анастасия Михайлова ден Виктория Александрова (нуным снимкыште ужыда) сеҥыше лийыныт. Нуно я районысо, я республикысе ятыр сылнымут таҥасымаште, этнокультур предметла дене олимпиадылаште эреак чолгалыкым ончыктат. Ӱдыр-влак шкеат палемдат: «Ӧрдыжкӧ кунар чӱчкыдын лектын коштына, тунар шуко тале марий еҥ-влакым ужына, марий шомак-влакым колына, тунар куштылгын кружокнан занятийлаштыже сылнымутан пашам шочыктена».
Чынак, еҥын тӱвыргӧ паша лектышыжым ужын, чын аклен моштымеке веле кушкын шогышо нӧргӧ икшывын мут поянлыкшат ешаралтеш. Южо икшыве, сылнымутан произведенийым лудын, марий шомаклам шарнен кодеш, ала-кӧжӧ Марий Эл радиом кажне кечын колыштеш, кумшо тӱшкаже марла телепередачым ончаш йӧрата, а вес тӱшка тунемше-влак шочмо йылме да сылнымут уроклам йӧратен тунемыт.
Тачысе саманыштат тыгай марий шӱлышан йоча-влак улыт. Мый шке пашагорнем гыч пример шотеш тыгай чолга тунемшем-влакын лӱмыштым кугешнен палемден коден кертам: Тимофеева Надежда, Рыжова Алевтина, Уразаева Ольга, Михайлова Кристина, Николаева Марина, Ялексеева Яна, Александров Анатолий, Андреев Леонид да Егоров Данил. Нине выпускникем-влак чыланат шке жапыштыже марий йылме да литератур дене олимпиадылаште районышто да республикыште сеҥыше радамыш логаледеныт. А тачысе кечын шке усталыкышт дене ойыртемалтыт да республикыште Шӱргыял школнан чапшым арален шогат Михайлова Анастасия, Александрова Виктория, Скворцов Геннадий ден Кузнецова Стелла.
Илыш ончыко йорта, саман вашталт толеш гынат, чолга да марий шӱлышан, шочмо йылме дене кугешнен моштышо икшыве-влак садыгак улыт. Мыланна, марий йылмым туныктышо-влаклан, лач шке жапыштыже нуным ужын, шижын да чын корнышко виктарен шукташна кӱлеш. Тыге ончыкыжым туныктымо аланыште у самырык вий ешаралтеш. А ме шкенам алмашташ тӱҥалше тунемшынам йывыртен ончаш тӱҥалына да тыге кугешнен пелештена: «Тиде чолга марий йылме туныктышыжо – мыйын тунемшем, корнемым тошкен да мыйын гаяк виян туныктышыш савырнен!..»
Елена Григорьева, Шӱргыял школын марий йылме туныктышыжо.
