Мемнан тӱняна моткоч кумда. Лач келшен, ваш пагален, пошкудын ойгыжым лош пайлен да умылен моштен гына илыман. Но, чаманен каласыман, еҥын ойгыжым умылаш да тудлан вий-куатым ешараш полшаш кӱлмӧ нерген шагалже годым шоналтена. Йырна ятыр еҥ уло, кудыжлан йокрок, неле да лишыл айдемыжат пеленже уке. А эше тудо инвалид радамышке пура гын, путырак йӧсӧ.
Шӱргыял школышто ынде икмынярымше ий волонтёр-влак илалше да инвалидлан шотлалтше еҥ-шамыч деке лектын коштыт. Тиде ийынат Кораксола кундемыште илыше инвалид-влак деке миен толыныт, почеламут корнылам, сылне мурым йонгалтареныт, сай тыланымашым каласеныт. А инвалид радамыш пурышо-влакын пуйто кажныжын шинчаончалтышыже тул сескем дене волгалтын.
Кораксола ялысе тӱвыра пӧрт пашаеҥ-влакат инвалидностян еҥ-влак деке миен коштыныт. Кажныжын чон ойгыжым, шонымашыжым лош пайлаш тыршеныт. Кажне ийын манме гаяк Кораксола ялыште илыше Галина Иванова ден Валентина Сергеева деке миен шуашак тыршена. Нуно кажне гана мемнам порын вашлийыт. Мийымынам йывыртен вучат.
Изи волонтёрна умылат: илышыште керек-кӧланат шере-кочо гоч эрташ перна. А тидым чытен лекташ лишыл айдеме эреак пелен лиеш гын веле куштылго.
Е.В.Григорьева, Кораксола тӱвыра пӧрт вуйлатыше.
Морко район.
Снимкылаште: Изи волонтёрна-влак Кораксола ялысе инвалид-влак деке мийымышт годым.