Вӱдшор тылзын 27-ше кечынже Морко кундемын 12 туныктымо тӧнежше гыч йочалан ешартыш шинчымашым пуышо туныктышо-влак «Радуга педагогических идей» районысо фестивальышке чумыргеныт.
Морко велне 300 утла тыгай туныктышо шке сомылжым кыртмен шуктен толеш. Нуно чыланат Морко районысо Йоча усталык рӱдер гоч школлаште да йочасадлаште кружокым эртарат. Кажныже илышын тӱрлӧ шӧрынжым авалта. Икте йочам мураш туныкта гын, весе куштымаш дене шуара, кумшо пӱртӱс дене шке занятийлажым кылда, а нылымше йӧршын у йӧным шонен муэш.
Фестиваль кум площадкым авалтен: мастарлык класс, «Туныктымо поянлыкын панорамыже» да «Кидпаша ончер». Кажне туныктышо моло-влакым шке усталыкше, паша надырже да тӱвыргӧ лектышыж дене палдарен.
Фестиваль концерт дене почылто. Молгунамсе семынак «Куштымаш тӱня» кружокын чолга тунемшыже-влак тӱрлӧ сынан куштымашым ончыктышт. Нуным Морко районысо Йоча усталык рӱдерыште тунемше-влаклан ешартыш шинчымашым пуышо чолга туныктышо Васильева Т.И. шуарен толеш. Туныктышо шкежат примерым ончыктен шога.
Умбакыже саламлымаш мут Йоча усталык рӱдер вуйлатыше Степанова Н.В. деч йоҥгыш. Наталья Владимировна фестивальым почо да эн чолга туныктышо-влаклан чап кагазым кучыктыш. А вара кажне участник тӧрлӧ площадкыште шке усталык поянлыкшым почын ончыктен кертын.
Чынжымак, коллеге-влакын каласкалымыштым колыштатат, лач ӧраш гына кодеш нунын чолгалыкыштлан. Вет кажне туныктышо уста. Теве Морко посёлкысо 1-ше №-ан йочасадыште «Йомак чондай» кружок пашам ышта. Изи падыраш-влак дене марла йомакым модыт. А кузе изи артист-влак марла кутыралтен колтат, тыште адакат нунын воспитательышт (Алексеева И.В.) да ача-аваштын кугу надырышт. Тидыже адакат шочмо марий йылмынам ончыкшымат виянракым ышташ ешартыш надыр.
Фестивальын иктешлымашыже почеш раш: тачысе кечын кажне туныктымо тӧнежыште йочалан тӱрлӧ велым вияҥаш чыла йӧн ышталтеш. Тидланже икшывын кумылжо вел лийже. Кружок-влак сентябрь гыч май марте эртаралтыт. Навигатор полшымо дене тушко чыла ача-ава шке ньогажым пурта. А тунемшылан ешартыш шинчымашым пуышо туныктышо кажне школышто уло. Тек мемнан икшывына-влак чолга кушкыт да илыш дене тӧр каят.
Елена Григорьева, Шӱргыял школышто «Марий сылнымут садвечыште» кружок вуйлатыше.
Снимкыште: Морко районышто эртаралтше «Радуга педагогических идей» фестивальын эн чолга участникше-влак.