Эртыше кечылаште республикыштына школласе спорт клуб-влакын таҥасымашыштын региональный йыжыҥже мучашлалтын.
Ныл кечыште самырык спортсмен-влак куштылго атлетикыште, 3х3 баскетболышто, спортивный ориентированийыште, мини-футболышто, шахматыште да брейн-рингыште таҥасеныт. Сеҥышыш Козьмодемьянск ола гыч «Дарований» школ-интернатын командыже лектын. Кокымшо верым Йошкар-Оласе 1-ше №-ан школ налын, кумшым – Волжский районысо Шарача школ.
Сеҥыше команде Марий Элын чапшым 4-24 майыште Краснодар крайыште «Смена» йоча рӱдерыште всероссийский йыжыҥыште аралаш тӱҥалеш.
Марий Элысе Образований да науко министерствын ВК-се тӱшкаж гыч налме фото.