Самырык шымлызе-влак!

Молодежный политике, спорт да туризм министерствын сайте гыч налме фото

25 мартыште Марий Элысе шуко профилян лицей-интернатыште «Большие вызовы» Российысе шанче да технологий проект-влак конкурсын регионысо трекшын финалже эртен.

Йошкар-Оласе да Волжск оласе школла гыч отборочный турышко лекше вич участник «Агропромышленные и биотехнологии» ден «Умный город и безопасность» направлений дене проектым аклаш луктын.

Эксперт-влак участник-шамычын пашаштым кӱкшын акленыт, конкурсын пытартыш этапыштыже ойыртемалташ манын, проект-влакым саемден толаш ой-каҥашым пуэныт.

Сеҥышыш Волжск оласе лицейын 7-ше классыштыже тунемше Юлиана Мичукова, Волжскысо экологий рӱдерын 10-шо классыштыже тунемше Глеб Мичуков лектыныт, Йошкар-Оласе 23-шо №-ан школ гыч 9-ше классыште тунемше Анастасия Милькова призёр лийын.

Школлаште тунемше-влак тыгак конкурсын дистанционный трекышкыже ушненыт. Тудым 1 апрельыште иктешлат. Сеҥыше-влаклан конкурсын пытартыш йыжыҥышкыже ушнаш йӧным пуымо.

10 апрель гыч 15 май марте «Большие вызовы» Российысе конкурсын пытартыш этапше эртаралтеш.