Чолга, чыла вере шуаш тыршыше ӱдыр-рвезе-влакым куанен ончет. Самырык пагытыштым пайдалын эртарен моштат, илыш деч почеш огыт код. Творческий паша нунылан вий-куатым ешара, чоным пойдара. Тыгай-влак кокла гыч иктыже − Провой кундем Чакмарий селаште шочын-кушшо, МарГУ-што Калыкле тӱвыра да тӱвыра кокласе кыл институтышто 3-шо курсышто тунемше Олеся Соловьёва. Тудо вузышто, рӱдолаште эртаралтше шуко мероприятийым, концертым вӱда, волонтёр пашам шукта.
Йоча жапше годсек чолга
Олеся Звенигово оласе лицейыште тунемын. Изинек чолга ӱдыр кушкын. Тунемме верыште эртаралтше тӱрлӧ конкурсышто, мероприятийыште эреак участвоватлен. «Лицейыште кажне ийын шошым «Шаг в науку» регионысо научно-практический конференций эртаралтын. Тушто докладым лудмем дене ятыр гана ончыл верлам налынам. Лицейысе, районысо, республикысе конкурслаште эре участвоватленам. Тунемме годым «Лицейын эн сай тунемшыже», шымлыме пашам шуктымо шотышто «Подрост» республикысе юниор конкурсышто да моло вере сеҥышыш лектынам. 9-10-шо класслаште Российысе «Орлёнок», «Артек» тӱнямбал йоча рӱдерлашке миен коштынам.
Руш йылме да ИКН предметла дене районысо, республикысе олимпиадылаште уш-акылем тергенам. Лицей пеленысе «Радость» коллективышке латкок ий коштынам»,− ойла ӱдыр.
Почеламутым сылнын лудеш
О.Соловьёва руш литературлан, поэзийлан чот шӱман. Тудо йоча жапше годсек почеламутым сылнын лудеш. Авторын шонымашыжым шӱм вошт колтен, калыклан намиен шукта, сценыште шкем мастарын кучен мошта. Сандене тӱрлӧ кӱкшытан конкурсышто участвоватлен. Нунын кокла гыч иктыже − «Живая классика» всероссийский конкурс.
«Поэзийлан авам Галина Константиновна шӱмаҥден. Тудо Чакмарий администрацийыште тырша. Почеламутым моткоч сылнын лудеш. Авамым ончен, мыят тудын гае лияш тыршенам», − ойла О.Соловьёва.
Тӱрлӧ мероприятийыште − вӱдышӧ
Ӱдыр 2018 ийыште лицейым шӧртньӧ медаль дене тунем пытарен. МарГУ-што «Международное направление» специальность дене англичан да француз йылмылам тунемеш. Тиддеч посна ты вузыштак юрфакыште ешартыш шинчымашым налеш.
Тудо организаторлан, вӱдышылан тырша гына огыл, тыгак МарГУ-со «Марий мурсем» ансамбльышке коштеш.
«Шукерте огыл вузысо «Точка кипения» рӱдерыште регионысо «Творческая мастерская» конкурс лие. Тудо марий йылмым туныктышо-влаклан слёт семын эртаралтын. Тушто мый организатор лийынам. Кодшо ийын «Радуга над Кокшагой» тӱнямбал фестиваль-конкурсым эртараш полшенам. 2019 ийыште «Богатство финно-угорских народов» всероссийский конкурсышто, рӱдоласе «Крымская весна» мероприятийыште вӱдышӧ лийынам. Тыгак олаште шуко мероприятийым вӱдем. Мыланем тыге илаш келша, творческий толкынышто пӧрдын, вий-куат ешаралтеш, эше пашам ышташ кумыл утыр лектеш. Тиддеч посна илышыжат мылам йокрокла чучеш», − ойла О.Соловьёва.
Группын старостыже О.Соловьёва эре уым кычалеш, уш-акылым пойдарен толеш. Вузым тунемын пытарымеке, Марий кундемышкак кодын, усталык пашам чон йӱлен ышташ, республикнан чапшым нӧлташ шона.